بەغدا – INA
عەدنان فەیحان دولەیمی، جێگری یەکەمی سەرۆکی ئەنجومەنی نوێنەرانی عێراق، ئەمڕۆ پێنجشەممە، لەگەڵ ساهیبە غەفارۆڤا، سەرۆکی پەرلەمانی ئازەربایجان، پرسی بەهێزکردنی هاوکارییە ئابووری و گەشتیارییەکان و چالاککردنی ئاڵوگۆڕی خوێندنی لە نێوان هەردوو وڵاتدا تاووتوێ کرد.
نووسینگەی ڕاگەیاندنی جێگری یەکەمی سەرۆکی ئەنجومەنی نوێنەران لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە، ڕایگەیاند: "شاندی پەرلەمانی عێراق بە سەرۆکایەتی عەدنان فەیحان دولەیمی، لە پەراوێزی بەشدارییان لە بیستەمین خولی کۆنفڕانسی یەکێتیی پەرلەمانەکانی وڵاتانی ئەندام لە ڕێکخراوی هاوکاریی ئیسلامی کە لە باکۆی پایتەختی ئازەربایجان بەڕێوەدەچێت، لەگەڵ ساهیبە غەفارۆڤا، سەرۆکی پەرلەمانی ئازەربایجان کۆبووەوە."
بەپێی ڕاگەیەندراوەکە، فەیحان لە سەرەتای دیدارەکەدا سوپاسی لایەنی ئازەربایجانی کرد بۆ پێشوازیی گەرم و ڕێکخستنی سەرکەوتووانەی کۆنفڕانسەکە، و جەختی لە "گرنگیی بەرزکردنەوەی ئاستی پەیوەندییەکانی عێراق و ئازەربایجان بۆ ئاسۆیەکی فراوانتر کردەوە، ئەوەش لە ڕێگەی چالاککردنی لێژنەی دۆستایەتیی پەرلەمانی و چڕکردنەوەی ئاڵوگۆڕی سەردان و شارەزاییە یاساییەکانی نێوان هەردوو وڵات."
فەیحان لە میانی دیدارەکەدا جەختی لەسەر "پێویستیی ئاسانکاری بۆ ڕێکارەکانی پێدانی ڤیزا بە خوێندکاران و گەشتیاران کردەوە، لەگەڵ چارەسەرکردنی ئەو گرفتانەی دێنە ڕێی ئەو خوێندکارانەی دەیانەوێت لە ناو عێراقدا بخوێنن، بە جۆرێک هاوکار بێت لە بەهێزکردنی هاوکارییە ئەکادیمی و کولتوورییەکان. جگە لەوەش ئاماژەی بە گرنگیی زیادکردنی قەبارەی ئاڵوگۆڕی بازرگانی و فراوانکردنی هاوبەشییە ئابووری و وەبەرهێنانەکان کرد."
ڕاگەیەندراوەکە ئاماژەی بەوەش کردووە کە "هەردوولا پێشوازییان لە ڕێککەوتنی ڕاگرتنی جەنگ لە نێوان ئێران و ویلایەتە یەکگرتووەکان کرد و هیوایان خواست ئەم هەنگاوە ببێتە هۆی بەهێزکردنی ئاسایش و سەقامگیریی ناوچەکە."
لای خۆشییەوە، غەفارۆڤا جەختی لە "پەرۆشیی وڵاتەکەی کردەوە بۆ توندوتۆڵکردنی پەیوەندییەکان لەگەڵ عێراق و پشتگیریکردنی ئاراستەکانی هاوکاریی پەرلەمانی، ئابووری و گەشتیاری، بە شێوەیەک کە خزمەت بە بەرژەوەندیی هەردوو گەلی دۆست بکات.
