بەدواداچوون – INA
شاندی هەڵبژاردەی تۆپی پێی ئێران ڕووبەڕووی دۆخێکی شڵەژان بووەتەوە لەناو کەمپی ئامادەکاریی خۆیدا لە شاری تیخوانای مەکسیک، ئەمەش نزیکەی دوو هەفتە پێش دەستپێکردنی مۆندیال و لەنێوان قەیرانێکی پەیوەندیدار بە ڤیزا و ئامادەیی تەکنیکییەوە.
باڵیۆزی ئێران لە مەکسیک، ئەبولفەزڵ پەسەندیدە ڕایگەیاند: "هەڵبژاردەکە تاوەکو ئێستا ڤیزای چوونەژوورەوەی بۆ ویلایەتە یەکگرتووەکانی ئەمریکا بەدەستنەهێناوە، ئەمەش ڕێگری لە پلانەکانی ئامادەکاری دەکات و ڕێگرە لە ئەنجامدانی مەشق و ڕاهێنانەکان بە شێوەیەکی سروشتی پێش دەستپێکردنی پاڵەوانێتییەکە".
باڵیۆزەکە لە کۆنگرەیەکی ڕۆژنامەوانیدا ڕوونیکردەوە: "ئێران هەست ناکات لەسەر پێگەیەکی یەکسان لەگەڵ هەڵبژاردەکانی دیکەدا ڕکابەری دەکات"، ئاماژەی بەوەشکرد "بوونی ئاستەنگی ڕێکخستن کاریگەری کردووەتە سەر بەرنامەی ئامادەکاری، لە کاتێکدا هەڵبژاردەکە کەمپەکەی گواستووەتەوە بۆ تیخوانا لە جیاتی شاری تۆکسۆنی ئەمریکی".
وتیشی: "دەسەڵاتدارانی ئەمریکا پابەند نەبوون بە دابینکردنی ئەو ئاسانکارییانەی کە داواکرابوون بۆ میوانداریکردنی هەڵبژاردەکە، سەرەڕای ئەوەی فیدراسیۆنی ئێران پێشتر داوای لە فیدراسیۆنی نێودەوڵەتی تۆپی پێ 'فیفا' کردبوو شوێنی کەمپەکە بۆ مەکسیک بگۆڕێت بە مەبەستی بەدووربوون لە ئاڵۆزییەکان".
هەر لەو چوارچێوەدا، باڵیۆزەکە ئاماژەی بەوەکرد: "یاریزانان تاوەکو ئێستا دڵنیا نین لە بەدەستهێنانی ڤیزاکانیان، ئەمەش دۆخی ناڕوونی پێش پاڵەوانێتییەکە زیاتر دەکات".
بڕیارە هەڵبژاردەی ئێران یارییەکانی قۆناغی کۆمەڵەکان لە کەناری ڕۆژئاوای ویلایەتە یەکگرتووەکانی ئەمریکا ئەنجام بدات، بە شێوەیەک کە لە لۆس ئەنجلۆس ڕووبەڕووی نیوزیلاندا دەبێتەوە، پاشان بەلجیکا، پێش ئەوەی یارییەکانی بەرامبەر میسر لە سیاتڵ کۆتایی پێ بهێنێت.
