بەغداد – INA
سەرۆکی بزووتنەوەی بابل، ڕەیان کلدانی،جەختی لەوە کردەوە کە هەمەجۆریی کەنیسەکان و تایەفە مەسیحییەکان بەشێکە لە ناسنامەی عێراق و شارستانیەتەکەی.
نووسینگەی ڕاگەیاندنی بزووتنەوەی بابل لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "ڕەیان کلدانی، سەرۆکی بزووتنەوەی بابل، زنجیرەیەک سەردانی چڕی بۆ ژمارەیەک لە کەنیسەکان و تایەفە مەسیحییەکان لە بەغداد ئەنجامدا، کە پێکهاتبوون لە تایەفەی ئینجیلی نیشتمانی، تایەفەی ئەنگلیکانی، و کەنیسەی یەکێتی ئینجیلی؛ ئەمەش لە چوارچێوەی هەوڵەکانیدا بۆ پاڵپشتیکردنی بوونی مەسیحییەکان و بەهێزکردنی بەهاکانی هاوڵاتیبوون و پێکەوەژیان لە عێراقدا."
ئەوەش هاتووە: "کلدانی سەردانەکانی بە دیدارێک لەگەڵ قەشە فاروق بەدیل حەمۆ، سەرۆکی تایەفەی ئینجیلی نیشتمانی لە عێراق دەستپێکرد، کە تێیدا جەخت لەسەر گرنگیی پەیوەندی نێوان سەرکردە ئاینی و کۆمەڵایەتییەکان کرایەوە، لەگەڵ پاڵپشتیکردنی ئەو هەوڵانەی کە بوونی پێکهاتە ڕەسەنەکان بەهێز دەکەن. لای خۆشییەوە قەشە فاروق پێشوازی لەو سەردانە کرد و ستایشی ڕۆڵی نیشتمانیی سەرۆکی بزووتنەوەی بابل و گرنگیدانی بە کاروباری پێکهاتەی مەسیحی کرد."
لەراگەیندراوەكەدا ئاماژه بهوهیش كراوه كه: "هەروەها کلدانی سەردانی سەرۆکایەتی تایەفەی ئەنگلیکانی لە عێراق کرد و لەگەڵ قەشە فایز جەرجیس، سەرۆکی تایەفەکە کۆبووەوە. لە دیدارەکەدا گفتوگۆکرا لەسەر پێویستی بەردەوامبوونی پەیوەندی نێوان کەنیسەکان و سەرکردە کۆمەڵایەتییەکان بە شێوازێک کە خزمەت بە ڕۆڵەکانی پێکهاتەی مەسیحی بکات و پارێزگاری لە ڕۆڵە نیشتمانییەکەیان بکات."
ئاماژە بەوەش کراوە: "کلدانی سەردانەکانی بە دیدارێک لەگەڵ قەشە جۆزێف فرەنسیس، سەرۆکی کەنیسەی یەکێتی ئینجیلی کۆتایی پێهێنا، کە ناوبراو پێشوازی لە کلدانی کرد و ڕێزی لە ڕۆڵی ئەو گرت لە پاڵپشتیکردنی بوونی مەسیحییەکان."
بەگوێرەی راگەیندراوەكە، ڕەیان کلدانی لە میانی ئەو سەردانانەدا دووپاتی کردەوە کە هەمەجۆریی کەنیسەکان و تایەفە مەسیحییەکان بەشێکە لە ناسنامە و شارستانیەتی عێراق، و جەختیشی لەوە کردەوە کە پاراستنی ئەم هەمەجۆرییە پێویستی بە هاوکاری بەردەوام و ڕۆحیەتێکی پڕ لە بەرپرسیارێتی هەیە لە نێوان هەموواندا.