شەفەق نيوز- بەغداد
شارەوانی فەرمانگەی کەڕادە لە بەغداد پایتەخت، ئمڕوو یەکشەممە، دەسکرد وە بەسانن ویستگەیل شووردن ماشین بیمووڵەت لەوەر قەیران ئاو و داوەزیان چەم دیجلە.
پەیامنێر ئاژانس شەفەق نیوز وت: شارەوانی کەڕادە، هەڵمەت گەورەیگ جیوەجی کرد ئەرا بەسانن ویستگەیل شووردن ماشین بیمووڵەت.
وتیش: ئی هەڵمەتە لەوەر داوەزیان ئاو چەم دیجلە تیەێد، وەتایبەت کە ئی ویستگەیلە ئاو فرەیگ خەرج کەن.
وەگورەی راپۆرتەیل نەتەوە یەکگرتگەیل و بانک ناوەندی، عراق یەکیگە لەو پەنج دەوڵەتە کە فرەترین زەرەد لە ئاڵشتبوین کەشوهەوا وەپی رەسیە، و نزیکەی 30% لە زەویەیل کشتوکاڵیی لەی سێ دەیەی گوزەشتە لەدەس داگە.