کوشیان کراکاریگ بیناسازی و زەخمداری یەکیگ ترەک وە رمیان دیواریگ لە دیالە

شەفەق نيوز- ديالە 

سەرچەوەیگ ئەمنی لە پارێزگای دیالە، ئەمروو سێشەممە، خەوەردا لە کوشیان کراکاریگ بیناسازی و زەخمداری یەکیگ ترەک مەوقەی کارکردن لە خوەرھەڵات بەعقووبە.

 سەرچەوەگە ئەرا ئاژانس شەفەق نیوز وت: کراکاریگ بیناسازی گیانی لەدەسدا و کراکاریگ ترەک زەخمدار بوی، ئەوەیش لە ئەنجام رمیان دیوار تەیمانەیگ مەوقەی کارکردنیان لە بیناسازی لە ناحیەی کەنعان خوەرھەڵات شار بەعقووبە.

 سەرچەوەگە وتیش: هیزیگ ئەمنی رەسیە شوین رویداوەگە و زەخمدارەگە ئەرا خەسەخانە رەسان، و تەرم قوربانیەگە ئەرا پزشک دادوەری برد، و لێکۆڵینەوە لە رویداوەگە واز کریا.