شەفەق نيوز/ فەرمانگەی کشتوکاڵی کەرکوک، ئمڕوو چوارشەممە، دەسکردن وە درەوکردن گەنم لە گشت ناوچەیل پارێزگاگە، وەکورەی مەزەنەی ئەوە کە بەرهەم ئی وەرزە بڕەسێدە نزیکەی 457 هەزار تون، لە رووبەر کاڵیاگ ژیانی لە 570 هەژار دۆنم لە زەویەیل ئاویاری.
ئەوەیش وەگەرد سەردان جینشین ئیداری وەزارەت کشتوکاڵی، مەهدی سەهر جبوری ئەرا کەرکوک هات، کە چەوی کەفتە ڕێبوار تەهای پارێزگار، وە ئامادەبوین عیسام سولەیمان عوبەیدی وەڕیەوبەر کشتوکاڵی کەرکوک و شاند یاوەری.
حکومەت کەرکوک لە بەیاننامەیگ رەسیە ئاژانس شەفەق نیوز وت: لە دیدارەگە باس سەختیەیل لەڕوی وەرز درەوکردن کریا، وەتایبەت ئەو بەرهەمەیل کشتوکاڵیە کە لە دەیشت پلان کشتوکاڵی کاڵیانە.
لەلای خوەیەو، وەڕیەوبەر کشتوکاڵی کەرکوک ئەرا ئاژانس شەفەق نیوز وت: وەزارەت کشتوکاڵی وەفەرمی رەزامەنی دا لەبان وەرگردن گەنم لە دەیشت پلان کشتوکاڵی، کە ڕووبەری رەسێدە ناوەین 300 تا 350 هەزار دۆنم، وتیش: ئەو برەیلە8وە نرخ فەرمی لەلایەن وەزارەت بازرگانی سینسەێد.
وتیش: ئی بڕیارە ئاڵشتبوین ئەرێنیە، کە جاران گەنم دەیشت پلان کشتوکاڵی وە نرخیگ کەمتر سەنیاد، و یەیش بار کشاوەرز سەنگینەو کردیاد.