شەفەق نیوز/ ئمڕوو سێشەممە، 9 ئەندام ئەنجومەن پارێزگای دیالە بەیاننامەیگ بڵاو کردن و وە فەرمانی دادگا، وە گلەوخواردن عومەر کروی جویر سەرۆک ئەنجومەن رازی نەوین.
ئەندامەیل لە بەیاننامەیگ کە لەلایەن سەرۆک دەسەی دەسپاکی ئەنجومەنەگە، تورکی عتێبی لەناو کۆنگرەیگ رووژنامەوانی کە ئاژانس شەفەق نیوز ئامادەی بوی، وت: "ئیمە ئەندامەیل ئەنجومەن پارێزگای دیالە، تەقەلایل دادگای کارگێڕی فرە بەرز نرخنیمن لە وەدویاچگن ئەرا پرسەیل ئەنجومەنەگەمان وەتایبەت ئەوانەگ پەیوەندی وە باوەت سەرۆکایەتی ئەنجومەنەو دیرن"، ئاشکرا کرد کە "بڕیارەیل دادگا پێچەوانەی خوازین فرەیی رەهای ئەندامەیل ئەنجومەن بویە".
وتیش: "زیاتر لە دوو لەبان سێی ئەو 12 ئەندامە دەنگ وە دەرکردن سەرۆک ئەنجومەن دانە، یەیش وە پشتبەسین وە دەسەڵاتە یاساییەیل و وەپەی چوارچیوە دەستورییە کاروەپیکریاگەیل، و لەوەر بویین گەندەڵی کارگێڕی و ساختەکردن ئاشکرای بڕیارەیل ئەنجومەن لەلایەن سەرۆک دەرکریاگ ئەرا خزمەتکردن بەرژەوەنییە کەسییەیل خوەی".
عتێبی وتیش: "وە پشتبەسین وە رکداریمان ئەرا دڵنیابوین لە رێکوپێکیی کارەیل ئەنجومەن و وەردەوامیی دانیشتنەیلی وەشیوەیگ یاسایی، داوا لە ئەنجومەن باڵای دادوەری کەیمن وە سەرۆکایەتی دادوەر فائق زیدان، وەدویاچگن ئەرا ئەو بڕیارە بکەێد کە لەلایەن ئەنجومەنەگەمانەو دەرچگە، کە لە ناو دانیشتنیگ دریاس کە گشت مەرجە کارگێڕی و یاسایی و فەرمییەیل لەناوی بوی، وەپەی بڕگەیل ئەنجومەن پارێزگایایل". یاسای شمارە 21 ساڵ 2008.
سەرۆک دەسەی دەسپاکی دووپات لەوە کرد کە "بڕیار دەرکردن ئەنجومەن ئەرا مقیەتیکردن کارەیل ئەنجومەن لەو وسانن و وهشککردنە کە وەرجەیە تویشی بویە، و ئەرا مسۆگەرکردن وەردەوامیی دانیشتنەیل لە بەرژەوەنی گشتی پارێزگای دیالە و خەڵکەگەی". وتیش: "ئمڕوو داوا لە ئەنجومەن باڵای دادوەری کەیمن سەرلەنووو نووڕین و دەسوەردان بکەێد لە جیوەجیکردن بڕیارەیل ئەنجومەن کە وەگورەی یاسا دریانە".
دویەکە دووشەممە، دادگای کارگێڕی بڕیار وسانن ریکارەیل دەرکردن عومەر کروی سەرۆک ئەنجومەن پارێزگای دیالە و گلەوخواردنی ئەرا پۆستەگەی دەرکرد.