شەفەق نیوز/ سەرچەوەیگ ئەمنی لە دیالە، ئمڕوو پەنجشەممە، خەوەردا لە زەخمداری ژنیگ خاوەن دڵنگ فرووشی وە لێدان چەقویگ لەمەوقەی مەرافیگ، لەهەمان وەخت دادگا لە پارێزگای زیقار سزای زیندانیکردن ئەرا هاوڵاتییگ دەرکرد وە مدوو زەخمداریدارکردن سێ کەس.
سەرچەوەگە وە ئاژانس شەفەق نیوز وت، "ژنیگ خاوەن دوکان فرووشتن دڵنگ وەکارهاتگ (لەنگە)لەناو بازاڕ خانەقین باکوور خوەرهەڵات دیالە، رویوەروی چەن لێدانیگ وە چەقوو بوی لەوەخت مەرافە".
وتیش "هێزەیل ئەمنی رەسینە شوین رویداوەگە و ژنەگە ئەرا چارەسەر کردن کلکردنە خەستەخانە، و لێکۆڵینەوە لە رویداوەگە وازکردن".
لە زیقاریش، سەرچەوەیگ وە ئاژانس شەفەق نیوز خەوەردا "دادگای تاوانەیل زیقار سزای هەفت ساڵ زیندانیکردن ئەرا هاوڵاتییگ دەرکرد وە مدوو زەخمداریکردن سێ کەس وە رویداو هاتوچوی لە باکوور پارێزگاگە".
دیاریکرد "بڕیارەگە وە پشت بەسان وە بڕگە مادەی 36 لە یاسای هاتوچوی شمارە 8 ساڵ 2019 دەرکریاس".