شەفەق نيوز/ عەلی سیستانی مەرجع ئایینی باڵا لە نەجەف، ئمڕوو دووشەممە، پرسە و سەرەخوەشی وە مردن پاپای ڤاتیکان فرانسیس کرد، و دووپات کرد کە خاوەن پایەی رووحی بەرزیگ بوی.
نویسینگەی سیستانی لە بەیاننامەیگ رەسیە ئاژانس شەفەق نیوز وت: وەداخەو چاو مردن قەشەی مەزن پاپا فرانسیس پاپای ڤاتیکان وەرگردیمن، کە خاوەن پایەی رووحی بەرزیگ بوی لەلغی مەردم فرەیگ لە زەوی، و رێز فرەیگ لەلای گشتی، لە ئەنجام ئەو رۆڵ جیاوازە کە ئەرا خزمەت پرسەیل ئاشتی و گەردنازایی رانیە، و نشاندان هاوخەمی وەرد ستەمدیدەیل لە جویراجویر شوینەیل جەهان.
وتیش؛ ئەو دیدار میژوویە کە وەگەرد مەرجع ئایینی لە نەجەف گردیانەو کرد، ویستگەیگ فرە گرنگ بوی ئەرا دووپاتکردن هەردوگ لایەن ئەرا رۆڵ بنەڕەتی باوەڕی وە خودای گەورە و پەیامەیلی و پابەندبوین وە ئەرزشەیل رەوشتی بەرز لە سەرکەفتن وەبان سەختیە گەورەیل لەڕوی مرۆایەتی لەی سەردەمە، و گرنگی گردەوبوین رەنجەیل ئەرا پاڵپشتیکردن کەلتوور وەیەکەوژیان و نفرەتکردن لە تونەڕەوی و خوسە، و چەسپانن ئەرزشەیل دووسی ناوەین مەردم لە بنەمای چەودیاریکردن مافەیل و رێزگردن وەرانوەری ناوەین باوەڕداران لە گشت ئاینەیل و هویرەیل.
وتیش: مەرجعیەت ئاینی باڵا کە پرسە و سەرەخوەشی ئەرا لایەنگرەیل کلیسای کاتولیک لە جەهان وەی کەلەمە پیشکەش کەێد، ئومید سەبووری ئەرایان خوازێد، و لاڵکێدە خودای گەورە منەت بکەێدە بان ئەوان و گشت مەردم وەشیوەیگ کە وەگەرد بەزەیی فراوانی لە خێر و بەرەکەت و ئاشتی پووڕێد.