شەفەق نيوز/ سەرچەوەیگ پزشکی لە پارێزگای سەڵاحەدین، ئمڕوو جمعە، خەوەردا لە پەیاکردن تەرم گەنجیگ کە دویای رفیانی کەفتیەسە وەر شکەنجە، لە خوەرهەڵات پارێزگاگە.
سەرچەوەگە ئەرا ئاژانس شەفەق نیوز وت: هیزیگ ئەمنی تەرم گەنجیگ وەناو (ز، ت، ئ) لەناو تەمەن بیس ساڵان پەیا کرد، کە لە کەنار ری نزیک ناوچەی بەنات ئەلحەسەن فڕە دریاوێد، و شوین شکەنجەدان وەقەی لەشیەو بویە.
وتیش: لاشەگە کەفتوێدە وەر شکەنجەی وەحشیانە وە (تیزاب) بسزن، دیاری کرد کە گەنجەگە وە گولە کوشیاس و بان چەویەیلی و دەسەیلی بوسیاوێن.
سەرچەوەگە وتیش: پولیس رەسیە شوین رویداوەگە و تەرمەگە ئەرا پزشک دادوەری برد لە خەسەخانەی سامەڕا.
سەرچەوەگە دیاری کرد کە ئەو گەنجە وەرجە نزیکەی سێ رووژ وەلایەن کەسەیلیگ نەناسیای رفیاس، و کەسوکارەیلی نەزانستنە رفیاس، و ئاگاداری لە بیسەروشوینیی توومار کردنە.