شەفەق نيوز/ سەرچەوەیگ ئەمنی لە پارێزگای زیقار، ئمڕوو سێشەممە، خەوەردا لە دەسگیرکردن 10 مامووستای ناڕەزا لە، مەوقەی وەرگردن چارەسەری لە خەسەخانە.
سەرچەوەگە ئەرا ئاژانس شەفەق نیوز وت: هیزیگ ئەمنی 10 کەس لە کادرەیل پەروەردە لە پارێزگای زیقار مەوقەی وەرگردن چارەسەری لە خەسەخانەی ناسریە دەسگیر کردن.
سەرچەوەگە وتیش: ئەو دە مامووستا لەناو خوەینشاندان دویەکە لە پارێزگاگە زەخمدار بوینە، و لە خەسەخانە دەسگیر کریان.
لەلای خوەییش؛ وەڕیەوبەرایەتی گشتی پەروەردەی زیقار شەرمەزار ئەو دەسدرویژیە کرد وەبان شمارەیگ لە کادرەیلی لەناو ناڕەزایەتی وەداوای بەشیگ لە مافەیلیان.
وەڕیەوبەرایەتیەگە لە بەیانامەیگ رەسیە ئاژانس شەفەق نیوز داوا لە لایەنەیل پەیوەندیدار کرد سزای ئەو کەسەیلە بیەن کە تەقەلای دەسدرویژی وەبان سەروەری پەروەردەکارەیل دانە، کە نوینەرایەتیی ستوین سەرەکی کەن ئەرا بیناکردن نەوەیل و خزمەت نیشتمان.
وەڕیەوبەرایەتیەگە داوا لە گشت کادرەیلی کرد نەکەفنە رویوەڕوی هیزەیل ئەمنی، و دەرفەت نەیەنە ئەو کەسەیلە کە خوازن ئی کارەیلە بکەن، و مقیەتی شیوەی ئاشتیانە بکەن لە داواکردن مافەیل، وەگەرد ئەوپەڕی ئاگاداربوین لەبان بیوەیی خوەیان، و نەهیشتن هەر کردەوەیگ لە بەرژەوەنی زانستی پەروەردەیی نەوود.
لە وەختیگ عەلی ئیسماعیل سەبتی وەڕیەوبەر گشتی پەروەردەی زیقار، وەگەرد فەرماندەی پولیس یەکانگیرەو بوی، ئەرا باسکردن لەی رویداوەیل دویاییە.
راگەیانن پەروەردەی زیقار وت: وەڕیەوبەر گشتی داوای مەرەقەزکردن ئەو مامووستایلە کرد، و فەرماندەی پولیسیش فەرمان مەرەقەزکردن گشت دەسگیرکریاگەیل لە کادرەیل پەروەردە دا، و دووپات لە رێز قویلی کرد ئەرا ئەو رۆڵ گەورە کە مامووستایەیل رانن بە پەروەردەی نەوەیل و دروسکردن بانان.
خوەینشاندەرەیل داوا لە حکومەت عراق کرد داوایەکیان جیوەجی بکەن وە راسەوکردن مووچەیل و بەشەوکردن زەوی ئەرا مسۆگەرکردن خاسەوبوین رەوشەیل ژیانیان.