شەفەق نیوز/ ناوچەی عیفار ناوڕاس شار حلە لە پارێزگای بابل، کارەساتیگ بیوینە وەخوەی دوینێد، دویای بڵاوبوین ئەو ڤایرۆس نادیارە کە بویە هوکار مردارەوبوین سەدان سەر گامیش، لەناو بیدسەڵاتی خاوەنەیلیان وەرانوەر ئی قەیرانە، و دیرکەفتن وەهاناڕەسین لایەنەیل پەیوەندیدار.
حامد رەهیف خاوەن گامیشە، کە لەی ڤایرۆسە زەرەدمەن بویە، دووپات کەێد کە زەرەدەگە گەورەس، و ڤایرۆسەگە وەردەوامە لە بڵاوبوین، کە خوەی تەنیا تا ئیسە 25 سەر گامیش لەدەسی چگە، و کەسەیلیگ ترەک شمارەیگ لەیە گەورەتریان فەوتیاس.
رەهیف ئەرا ئاژانس شەفەق نیوز وتیش: ئی بیماریە وەرجە 10 رووژ رەسیە ئاوایەگە، و گامیشەیل فرە تەویان گرێد، ئیجا مرادراەو بوون، دیاری کرد کە تەقەلای چارەسەری دایمن وەلێ بیخود، و ڤێتێرنەری واکسین لە وەهت خوەی نەهاورد.
کەسەیلیگ ترەک لە خاوەن گامیشەیل وتن؛ هاتێ ئی بیمارەیل لەڕی هاوردەکردن ئاژەڵ بیمار هاتیەسە ناو وڵات، کە یەکیگیان وت: ژنەفتیمن کەشتییگ هاتیە ئاژەڵ بیمار هەڵگردیە، کە بایەس بوی نەیلن باێدە ناو، وەلێ رەسیە ناو وڵات و بیمارەگە بڵاو بوی.
وەرانوەر ئەوە، ئەحمەد فەرهود وەڕیەوبەر فەرمانگەی ڤێتێرنەری لە بابل، دووپات کەێد کە هەڵمەت واکسین و تەمیسکردن وەردەوامە، وەلێ بەشیگ لە خاوەن ئاژەڵەیل رازی نەوین واکسین ئاژەڵیان بکەن، کە بڵاوبوین ڤایرۆسەگە زیایەو بوی.
ئەرا ئاژانس شەفەق نیوز وتیش: تیمەیل ڤێتێرنەری لە گشت وەختەگە کار کەن، وەلێ پابەندنەوین بەشیگ لە خاوەن ئاژەڵەیل وە ریکارەیل رخداری رەوشەگە زیایەو کرد.
وەگەرد وەردەوامی بڵاوبوین ڤایرۆسەگە، خاوەن گامیشەیل تویش گیچەڵ قورتاربوین لە گامیشەیل مردارەوبوی تیەن، کە بەشیگیان لەناو ریەیل گشتی فڕەی دەن، کە یەیش رخداری بڵاوبوین ڤایرۆسەگە زیای کەێد، لە وەختیگ تیمەیل شارەوانی و ڤێتێرنەری ئەو گامیشەیل مردارەوبویە گردەو کەن، وەلێ دیرکەفتن ئی کارە هیلێد ناوچەگە بکەفێدە ژیر هەڕەشەی بڵاوبوین پەنا و بیماریەیل.
وەگەرد زیایبوین شمارەی مردارەوبوین رووژ لە دویای رووژ، خاوەن گامیشەیل لە عیفار داوای راگەیانن ئامادە باشی فریاکەفتن ڤێتێرنەری کەن، و وسانن هاوردەی ئاژەڵ وەشیوەیگ وەختانە، و دابینکردن واکسین و چارەسەری، وەرجەیەگ قەیرانەگە بوودە کارەساتیگ هەڕەشەی سامان ئاژەڵی بەێد لە عراق.