بەغدا - INA
ئەمڕۆ هەینی،دەستەی گشتیی کەشناسی و چاودێری بوومەلەرزەزانی، چوار هۆکاری سەرەکی دیاری کرد کە لە پشت توندبوونی پلەکانی گەرما و دیاردە کەشوهەواییەکانەوەن لە وڵاتدا.
عامر جابری،بەڕێوەبەری ڕاگەیاندنی دەستەکە، بە ئاژانسی هەواڵی عێراقی (INA)ی ڕاگەیاند: چوار فاکتەری بنەڕەتی هەن کە دەبنە هۆی توندی گۆڕانی کەشوهەوا، یەکەمیان کەمبوونەوەی ڕووبەرە ئاوییەکان و لەدەستدانی پلانی پاراستنی ئاوی ژێرزەوی وەک ئەنجامێک بۆ بڵاوبوونەوەی هەڕەمەکیی بیری ئیرتوازی لەلایەن هاووڵاتییانەوە، دووەمیان بەردەوامبوونی پرۆسەی تێکدانی باخەکان و گۆڕینیان بۆ کۆمەڵگەی نیشتەجێبوون و نەخۆشخانە.
جابری ڕەخنەی لە ئەوە گرت کە بەسەر باخەکانی ناوچەی حوورییە لە بەغدا هاتووە وەک نموونە، دوای ئەوەی داخراون و گۆڕاون بۆ تەنە کۆنکرێتییەکان و کۆمەڵگەی نیشتەجێبوون کە سنووریان بۆ هەناسەدانی سروشتیی ناوچەکە داناوە.
ئاماژەی بەوەشکرد : هۆکاری سێیەم لە مەترسی (پێشڕەویی بەبیابانبوون)دایە کە نزیک بووەتەوە لە دەوروبەری پایتەخت، جگە لە هۆکاری چوارەم کە بریتییە لە دەرچوونی گازەکان بەشێوەیەکی هەڕەمەکی کە لە زۆری ئۆتۆمبێل و مۆلیدە ئەهلییەکان و کارگەکانەوە لە ناو گەڕەکە نیشتەجێبوونەکاندا دروست دەبێت.
جابری دۆسیەی ئاو و بەبیابانبوونی بە مەترسیدارترین دۆسیە وەسف کرد کە وڵات لەم کاتەدا ڕووبەڕووی دەبێتەوە.
سەبارەت بە چارەسەرە پێشنیارکراوەکان، بەڕێوەبەری ڕاگەیاندنی دەستەکە جەختی لەسەر پێویستیی ڕوولێکردنی دەستبەجێ بۆ چارەسەرە پێشوەختە سادەکان وەک چاندنی خێرای دار و زیادکردنی ڕووبەری سەوزایی کردەوە، لەبری ئەوەی واقیعی ژینگەیی ببەسترێتەوە بە چاوەڕوانکردنی پڕۆژە ستراتیژییە درێژخایەنەکان کە ڕۆتینی کارگێڕی و خوێندنەوەی دووبارەی بەهای ئابووری بە درێژایی ساڵان پەکیدەخەن.