نێودەوڵەتی – INA
ڕێکخراوی جیهانیی کەشناسی، ئەمڕۆ سێشەممە جەختی کردەوە کە ئەگەری ڕوودانی دیاردەی ئێل نینۆ لە نێوان حوزەیران و ئابدا دەگاتە 80%، ئەمەش ڕەنگە مەترسیی دیاردە کەشوهەواییە توندەکان لە ماوەی داهاتوودا زیاتر بکات.
بەپێی دوایین ڕاپۆرتی ڕێکخراوی سەر بە نەتەوە یەکگرتووەکان، بەرزبوونەوەی نائاسایی پلەکانی گەرمای ئاوی زەریای هێمن، بارودۆخی گونجاو بۆ دروستبوونی دیاردەی ئێل نینۆ دەڕەخسێنێت، کە پێشبینی دەکرێت کاریگەری لەسەر شێوازەکانی پلەی گەرمی و بارانبارین لەسەر ئاستی جیهان هەبێت.
ڕێکخراوەکە ئاماژەی بەوەش کردووە، ئەگەری بەردەوامبوونی ئەم دیاردەیە لانی کەم تا تشرینی دووەم، نزیکەی 90% یان زیاترە، و پێشبینی دیاردەیەکی مامناوەند یان بەهێز دەکەن.
بەپێی ڕێکخراوی جیهانیی کەشناسی، لە نێوان کۆتایی نیسان و ناوەڕاستی ئایاردا، پلەکانی گەرمای ڕووی دەریا لە بەشی ناوەڕاستی ڕۆژهەڵاتی زەریای هێمنی کەمەرەیی، نزیک بوونەتەوە لەو سنوورانەی کە تایبەتمەندن بەم دیاردەیە، ئەمەش بەرزبوونەوەیەکی هاندراوە بەهۆی پلەکانی گەرمای نائاسایی بەرز، کە بە ڕێژەی زیاتر لە 6 پلەی سەدی لە تێکڕای وەرزییەکان تێدەپەڕێت.
دیاردەی ئێل نینۆ بە بەرزبوونەوەی پلەکانی گەرمای ڕووی ئاو لە ناوەڕاست و ڕۆژهەڵاتی زەریای هێمنی کەمەرەیی دەناسرێتەوە، بەزۆری دوو بۆ حەوت ساڵ جارێک ڕوودەدات، و لە نۆ بۆ دوازدە مانگ بەردەوام دەبێت.
سەرچاوە: ئاژانسی هەواڵی فەڕەنسی