دۆناڵد ترامپ، سەرۆکی ئەمەریکا لە پەیامێکدا لە تۆڕی کۆمەڵایەتی تروث سوشیاڵ ڕایگەیاند یۆرانیۆمی پیتێنراوی ئێران یان دەبێت دەستبەجێ بگەیەنرێتە ئەمەریکا بۆ لەناوبردن، یان باشترە بە هەماهەنگی و هاوکاری خودی کۆماری ئیسلامی ئێران، لە شوێنێک لەناوببرێت.
سەرۆک ترامپ لە درێژەی دوایین پەیامەکەی لە تروث کە ئێوارەی دووشەممە،25 ی مانگی پێنج بڵاویکردووەتەوە، نووسیویەتی "پێویستە پرۆسەی لەناوبردنی تۆزی ئەتۆمی [یۆرانیۆمی پیتێنراو] بە ئامادەبوون و سەرپەرشتیکردنی کۆمیسیۆنی وزەی ئەتۆمی یان دامەزراوەیەکی هاوتای ئەنجامبدرێت."
سەرۆکی ئەمەریکا وردەکاری زیاتری سەبارەت بە چوارچێوەی ئەگەری پلانەکە یان پەیوەندییەکەی بە دانوستانە بەردەوامەکانی ئەمەریکا و ئێرانەوە نەخستەڕوو، بەڵام ئەم تێبینیانە لە کاتێکدایە کە هەوڵە دیپلۆماسییەکان بۆ گەیشتن بە ڕێککەوتنێکی نوێ سەبارەت بە بەرنامە ئەتۆمییەکەی تاران بەردەوامن.