بەدواداچوون – INA
کۆشکی سپی، ئەمڕۆ پێنجشەممە، ڕایگەیاند کە ئێران لە گفتوگۆکانی لەگەڵ ویلایەتە یەکگرتووەکانی ئەمریکا بەردەوامە و ئارەزووی هەیە بگاتە ڕێککەوتنێک. هاوکات جەختی لەوەش کردەوە کە دۆناڵد ترەمپ، سەرۆکی ئەمریکا، ڕێگە نادات هیچ هەڕەشەیەک بۆ سەر کەشتیوانی لە گەرووی هورمز دروست بێت.
کارۆلین لیڤیت، وتەبێژی کۆشکی سپی، لە لێدوانێکدا ڕایگەیاند: "ئێران لە گفتوگۆکانی لەگەڵ ویلایەتە یەکگرتووەکان بەردەوامە و دەیەوێت بگاتە ڕێککەوتن." سەبارەت بە هێرشەکانی ئەمدواییەی سەر ئێرانیش، ئاماژەی بەوە کرد کە ئەو هێرشانە وەک وەڵامێک بوون بۆ پێشێلکردنی یاداشتی لێکتێگەیشتن لەلایەن تارانەوە.
وتەبێژەکە وتیشی: "سەرۆک دۆناڵد ترەمپ بۆ جیهانی سەلماندووە کە ویلایەتە یەکگرتووەکان دەتوانێت لە هەر کات و لە هەر شوێنێک بێت لە ئێران بدات." بەڵام جەختی کردەوە کە ترەمپ هەمیشە دەرگای بۆ چارەسەری دیپلۆماسی واڵایە، چونکە بڕوای بە پرەنسیپی "بەدیهێنانی ئاشتی لە ڕێگەی هێزەوە" هەیە.
لیڤیت ئاماژەی بەوەش کرد کە هەڵوێستەکانی سەرۆک ترەمپ و جی دی ڤانسی جێگری، سەبارەت بە پرسی ئێران تەواو هاوتان.
لە کۆتایی لێدوانەکەیدا، وتەبێژی کۆشکی سپی هۆشداریی دا و ڕایگەیاند: "سەرۆک ترەمپ ڕێگە بە ئێران نادات تەقە لە کەشتییەکان لە گەرووی هورمز بکات بێ ئەوەی ڕووبەڕووی لێکەوتە و سزای قورس ببێتەوە.
