بەغدا – INA
لیژنەی وزەی پەرلەمان، ئەمڕۆ پێنجشەممە، لەگەڵ کۆمپانیای گشتیی دابەشکردنی کارەبای ناوەڕاست ئامادەکارییەکانی تایبەت بە زیارەتی چلەی ماتەمینییان تاوتوێ کرد؛ هاوکات لیژنەکە پێشنیاری گرنگیی چالاککردنی "وەرچەرخانی زیرەک"ی لە کەرتی دابەشکردنی کارەبادا کرد.
فەرمانگەی ڕاگەیاندنی ئەنجومەنی نوێنەران لە ڕاگەیەندراوێکدا کە بۆ ئاژانسی هەواڵی عێراقی (INA) ی ناردووە، ڕایگەیاند: : "فەلاح سەعید جەرمەت، سەرۆکی لیژنەی وزەی پەرلەمان، بە یاوەریی ئەندامانی لیژنەکە، سەردانی کۆمپانیای گشتیی دابەشکردنی کارەبای ناوەڕاستیان کرد بۆ ئاگاداربوون لە ڕەوشی تۆڕی کارەبا و ئامادەکارییەکان بۆ زیارەتی چلەی ئیمام حوسێن."
لە کۆبوونەوەیەکی فراواندا لەگەڵ بەڕێوەبەرانی فەرمانگەکانی کۆمپانیاکە، باس لە چەندین دۆسیەی تەکنیکی کرا، لەوانە جێگیربوونی سیستەمی کارەبا و بڕی کەرەستە یەدەگەکانی ناو کۆگاکان. بەڕێوەبەری گشتیی کۆمپانیاکە بەوەکالەت، کورتەیەکی لەسەر پڕۆژەکانی چارەسەرکردنی بارزۆری، بەهێزکردنی خەزینە، دانانی پێوەری زیرەک و پەرەپێدانی سیستەمی کۆنترۆڵ و پەیوەندییەکان خستە ڕوو؛ هەروەها ئاماژەی بە کارەکانی نۆژەنکردنەوەی تۆڕەکانی دابەشکردن و ڕووناککردنەوەی ڕێگای زیارەتکاران لە پارێزگاکانی دیالە و واست کرد.
سەرۆکی لیژنەی وزە جەختی کردەوە لەسەر "گرنگیی وەرچەرخانی زیرەک لە کەرتی دابەشکردنی کارەبادا، بەتایبەت لە ڕێگەی فراوانکردنی دانانی پێوەری زیرەک، بەکارهێنانی سیستەمی پارەدانی ئەلیکترۆنی لە کۆکردنەوەی پارەی کارەبا هەوڵدان بۆ نەهێشتنی سەرپێچییەکان و کەمکردنەوەی بەفیڕۆچوونی وزە، لەگەڵ بەهێزکردنی بەرنامەکانی دەستپێوەگرتنی کارەبا."
لە کۆتایی سەردانەکەدا، شاندی پەرلەمان بەشی کۆنترۆڵ، کارپێکردن و پەیوەندییەکانیان بەسەرکردەوە بۆ ئاگاداربوون لە بڕی کارەبای دابینکراو، کاتەکانی پێدانی کارەبا و چۆنیەتی بەڕێوەچوونی کارەکانی چاککردنەوە.
