بەغداد - INA
ڕازی شنێشل، ڕاهێنەری پێشووی هەڵبژاردە نیشتمانییەکانی عێراق، داوای داڕشتنی پلانێکی کاری خێرا و بەپەلەی کرد بۆ سەرلەنوێ بنیاتنانەوەی هەڵبژاردەی نیشتمانی، و جەختی لەوە کردەوە کە بەدەستهێنانی ئەنجامی باش پێویستی بە کارکردنی درێژخایەن هەیە، نەک چارەسەری کاتی.
شنێشل بە ئاژانسی هەواڵی عێراقی (INA)ی ڕاگەیاند: "گەیشتن بە ئاستی هەڵبژاردە پێشکەوتووەکان پێویستی بە بەردەوامی لە کارکردن و هەبوونی پلانێکی ڕوون هەیە، چونکە ئەو هەڵبژاردانە سەرکەوتنەکانی خۆیان لەسەر بنەمای ساڵانێک لە پلاندانان و پەرەپێدان بنیات ناوە"، ئاماژەی بەوەش کرد کە قۆناغی ئێستا پێویستی بە جوڵەیەکی خێرا هەیە لە ڕێگەی دەستنیشانکردنی کۆمەڵێک یاریزانی لاوی سەرنجڕاکێش و بەهرەمەند کە توانای نوێنەرایەتیکردنی هەڵبژاردەکەیان هەبێت لە ماوەی پێنج بۆ شەش ساڵی داهاتوودا، بە شێوەیەک کە جێگیریی هونەری بۆ تپەکە دەستەبەر بکات.
جەختیشی لەوە کردەوە کە "پێکهێنانەوەی هەڵبژاردەکە لە خاڵی سفرەوە چارەسەری نموونەیی نییە، چونکە ئەوە دەرفەتێکی گەورەتر دەداتە هەڵبژاردەکانی دیکە بۆ باڵادەستبوون، لە کاتێکدا عێراق خاوەنی ژمارەیەک یاریزانی لاوە کە دەتوانن ببنە ناوک و بناغەیەکی باش بۆ داهاتووی هەڵبژاردەکە".
شنێشل ئاماژەی بەوەش دا کە "پڕۆسەی بنیاتنانەوە دەبێت هاوتەریب بێت لەگەڵ گرنگیدان بە یاریزانانی له ههموو تهمهنهكان و دۆزینەوەی بەهرەمەندەکان، هاوشێوەی ئەو سیستمەی کە زۆرێک لە فیدراسیۆنەکان پەیڕەوی دەکەن، ئەمەش هاوکار دەبێت لە ئامادەکردنی هەڵبژاردەیەک کە توانای ڕکابەریکردنی لە پاڵەوانێتی و شایستە داهاتووەکاندا هەبێت".
