بەغداد - INA
ئەمڕۆ یەکشەممە، وەزارەتی ناوخۆ ئەو لێدوانانەی ڕەتکردەوە کە باس لە بوونی ٦٠٠ هەزار کارمەند لەناو وەزارەتەکەدا دەکەن کە (دوو مووچە) وەربگرن، هاوکات جەختیشی کردەوە کە مافی یاسایی خۆی دەپارێزێت.
لیوا میقداد میری، سەرۆکی فەرمانگەی پەیوەندییەکان و ڕاگەیاندن لە وەزارەتی ناوخۆ، :"وەزارەتی ناوخۆ بە توندی و بە شێوازێکی بڕاوە ئەو قسانە ڕەتدەکاتەوە کە لە لێدوانەکانی محێ مورتەزا قەزوینی، سەرۆکی ئەنجومەنی فیدراڵیی ڕاژەی گشتیدا هاتوون سەبارەت بە بوونی (٦٠٠ هەزار) کارمەند لە وەزارەتی ناوخۆدا کە مووچەی دووانە وەردەگرن، و جەخت دەکاتەوە کە ئەم بانگەشانە سەرلەبەریان دوورن لە ڕاستییەوە و پشت بە هیچ بەڵگە یان دۆکیۆمێنتێکی فەرمی نابەستن."
ئهوهیش هاتووه كه: "وەزارەتی ناوخۆ سیستمی پێشکەوتووی وردبینی و چاودێریی دارایی و کارگێڕی پەیڕەو دەکات، و مووچەی کارمەندانی ژێر چاودێری و ڕێکاری توندی وردبینی لایەنە پەیوەندیدارەکاندایە، و مەحاڵە ژمارەی وای خەیاڵی تێپەڕێت کە چوونە ناو ڕاستییەوەیان نییە، وەزارەتیش ئامادەیی خۆی نیشان دەدات بۆ پێشوازیکردن لە هەر لایەنێکی چاودێریی پەیوەندیدار بە وردبینی بۆ دڵنیابوونەوە لەم بابەتە."
به گوێرهی راگهیندراوهكه ناوبراو وتیشی: "لە کاتێکدا وەزارەت سەرسوڕمانی خۆی لە بەرامبەر دەرکردنی ئەم جۆرە لێدوانە نابەرپرسانەدا دەردەبڕێت، جەختیش دەکاتەوە کە بڵاوکردنەوەی زانیاریی چەواشەکارانە کە زیان بە دامەزراوەکانی دەوڵەت بگەیەنێت، زیان بە ڕای گشتی دەگەیەنێت و ئامانج لێی دروستکردنی پشێوی و شێواندنی ڕاستییەکانە، داواش لە هەموان دەکات وردبن و زانیارییەکان لە سەرچاوە فەرمییەکانیانەوە وەربگرن، و نەکەونە دوای ئەو بانگەشانەی کە متمانەیان نییە."
ئاماژەی بەوەش دا کە "وەزارەتی ناوخۆ مافی یاسایی تەواوی خۆی دەپارێزێت لە گرتنەبەری ڕێکاری پێویست بەرامبەر هەر کەسێک کە زانیاریی درۆ بڵاوبکاتەوە، یان ژمارە و ڕووداوی ناڕاست بداتە پاڵ دامەزراوەکە کە ببێتە هۆی سووکایەتیکردن بە دامەزراوەی ئەمنی و کارمەندەکانی."
