بەغداد - INA
ڕێکخەری ڕاگەیاندنی هەڵبژاردەی نیشتمانی، سەلام مەناسیر، دووپاتی کردەوە کە توندوتۆڵکردنی پەیوەندییەکان لەگەڵ هۆکانی ڕاگەیاندندا، ڕەنگدانەوەی ڕاستەوخۆی هەبووە لەسەر سەقامگیریی هەڵبژاردەکە لە ماوەی ڕابردوودا، و بەشدار بووە لە بەدیهێنانی خەونی سەرکەوتن بۆ یارییەکانی کۆتایی جامی جیهانی (مۆندیالی 2026).
مەناسیر بە ئاژانسی هەواڵی عێراقی (INA)ی ڕاگەیاند: "ڕاهێنەری ئوسترالی، گراهام ئارنۆڵد، پێداگربووە لەسەر ئاراستەکردنی سوپاس و پێزانین بۆ هۆکانی ڕاگەیاندن، و ئاماژەی بەوە کردووە کە ئەو کەشوهەوا ئەرێنییەی لە ماوەی نۆ مانگی ڕابردوودا یاوەری شێرەکانی ڕافیدەین بووە، کاریگەرییەکی ڕوونی لە ناو ژووری جلگۆڕینی هەڵبژاردەکەدا هەبووە".
وتیشی: "ڕاهێنەر لە ماوەی ڕابردوودا کاری لەسەر چاککردن و بەهێزکردنی پەیوەندییەکان لەگەڵ ڕاگەیاندندا کردووە، ئەمەش دوای دەستنیشانکردنی هەندێک کێشەی دەرەکی کە کاریگەرییان لەسەر یاریزانان دەکرد"، ڕوونیشی کردەوە کە "ئەرێنیبوونی ڕاگەیاندنەکان نیشاندەرێکی گرنگە بۆ قەبارەی ئەو کاریگەرییە مەعنەوییەی کە لەسەر ئاستی یاریکردنی هەڵبژاردەکە ڕەنگی داوەتەوە".
مەناسیر ڕوونکردنەوەی دا کە "ڕاهێنەر ئارنۆڵد، لە ژێر سایەی پشتگیریی ئێستای ڕاگەیاندن و جەماوەردا هەست بە ئاسوودەیی و دڵخۆشی دەکات، و هیوادراوە ئەم کەشوهەوا ئەرێنییە لە ماوەی قۆناغی داهاتووشدا بەردەوام بێت".
ئاماژەی بەوەش کرد کە "لیستی سەرەتایی هەڵبژاردەی نیشتمانی لە چەند ڕۆژی داهاتوودا ڕادەگەیەنرێت و لە نێوان 33 بۆ 35 یاریزان لەخۆدەگرێت، لە کاتێکدا لیستی کۆتایی کە 26 یاریزان پێکهاتووە لە یەکی حوزەیرانی داهاتوودا بڵاودەکرێتەوە".
