بەغدا – INA
ئەمڕۆ دووشەممە، فڕۆکەخانەی نێودەوڵەتیی بەغدا، گەڕانەوەی گەشتەکانی هێڵە ئاسمانییەکانی تورکیای لە ڕۆژی پێنجشەممەی داهاتووەوە ڕاگەیاند.
حارس عوبەیدی، بەڕێوەبەری فڕۆکەخانەی نێودەوڵەتیی بەغدا، لە ڕاگەیەندراوێکدا کە دەست ئاژانسی هەواڵی عێراقی (INA) کەوتووە، ڕایگەیاند: "چاوەڕوان دەکرێت لە 14ی ئایارەوە گەشتەکانی هێڵە ئاسمانییەکانی تورکیا دەستپێبکەنەوە، ئەمەش دوای وەستانێکی زیاتر لە دوو مانگ کە بەهۆی داخستنی ئاسمانی عێراق لە مانگی شوباتی ڕابردوودا هاتبووە ئاراوە".
ئاماژەی بەوەش کرد: "فڕۆکەخانەی نێودەوڵەتیی بەغدا 90%ی توانای کارکردنی خۆی بەدەستهێناوەتەوە، هاوکات لەگەڵ دەستپێکردنەوەی گەشتەکانی هێڵە ئاسمانییەکانی قەتەر لە دوێنێوە".
