بەغدا – INA
ئەمڕۆ دووشەممە، فەرماندەیی ئۆپەراسیۆنەکانی بەغدا، داخستنی چوار کارگەی دووبارە بەکارهێنانەوەی کەرەستە پلاستیکییەکانی ڕاگەیاند کە پێچەوانەی ڕێنماییە ژینگەییەکان بوون.
لە ڕاگەیەندراوێکی فەرماندەییەکەدا کە دەست ئاژانسی هەواڵی عێراقی (INA) کەوتووە، هاتووە: "بە مەبەستی کەمکردنەوەی پیسبوونی ژینگە کە بەهۆی دەردانی گاز و ئەو بۆنانەی لەگەڵ پڕۆسەی بەرهەمهێناندا دروست دەبن، و وەک تەواکەری ئەرکەکانی لیژنەی فەرمانی دیوانی (241285) لە بەدواداچوون و وردبینیکردنی (کارگەکان و کورەکانی توانەوەی کانزاکان) و داخستنی ئەوانەی مۆڵەتیان نییە، بە هاوبەشی لەگەڵ مەفرەزەکانی وەزارەتی ژینگە و (فەرمانگە شارەوانییەکان)، هێزە ئەمنییەکانمان توانییان چوار کارگەی دووبارە بەکارهێنانەوەی کەرەستە پلاستیکییەکان دابخەن کە سەرپێچی ڕێنماییە ژینگەییەکانیان کردبوو و ببوونە هۆی پیسبوونی ژینگە، ئەمەش لە چوارچێوەی (قەزای زەورا) لە ڕۆژهەڵاتی بەغدای پایتەخت".
