بەغدا - INA
ئەنجومەنی وەزیران لە کۆبوونەوەی ئاسایی خۆیدا کە ئەمڕۆ سێشەممە بە سەرۆکایەتی محەمەد شیاع سودانی، سەرۆکی ئەنجومەنی وەزیران بەڕێوەچوو، چەند بڕیارێکی دەرکرد، کە گرنگترینیان تەرخانکردنی بڕە پارەیەک بوو وەک شایستەی دارایی بۆ خێزانی شەهیدان و بریندارانی قوربانیی هێرشە سەربازییەکانی ئەم دواییەی سەر خاکی عێراق.
نووسینگەی ڕاگەیاندنی سەرۆک وەزیران لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "محەمەد شیاع سودانی، سەرۆکی ئەنجومەنی وەزیران، ئەمڕۆ سێشەممە سەرۆکایەتی ١٧هەمین کۆبوونەوەی ئاسایی ئەنجومەنی وەزیرانی کرد، کە تێیدا باس لە بارودۆخی گشتی وڵات کرا و پێداچوونەوە بەو بابەتانەدا کرا کە لە کارنامەی کۆبوونەوەکەدا بوون و بڕیاری پێویستیان لەسەر درا".
ههروهها ئهوهیش هاتووه كه: "ئەنجومەن بەدواداچوونی بۆ بڕیار و ڕێکارە حکومییەکانی پەیوەست بە کەمکردنەوەی خەرجییەکانی دامەزراوە حکومییەکان، زیادکردنی داهاتەکان، چارەسەرکردنی دۆخی دارایی و دۆزینەوەی چارەسەری ئابووری بۆ دڵنیابوون لە بەردەوامی پڕۆژەکانی ژێرخان و بزووتنەوەی گەشەپێدان و بەردەوامی پێشکەشکردنی خزمەتگوزارییەکان بە هاووڵاتیان کرد".
له راگهیندراوهكهدا ئهنجومهنی وهزیران ئاماژەی بەوەش کرد: "وەک ڕێزگرتنێک لە شەهیدانی کۆمەڵکوژیی سپایکەر، ئەنجومەنی وەزیران بڕیاریدا کە تەواوی دامەزراوەکانی دەوڵەت لە ڕۆژی ١٢ی حوزەیرانی ٢٠٢٦ خولەکێک بێدەنگی ڕابگرن و سوورەتی فاتیحە بۆ گیانی شەهیدان بخوێنن، هەروەها دروشمێک بۆ یادکردنەوەی تاوانەکە و قوربانییەکانی لەسەر نووسراوە فەرمییە ناوخۆیی و دەرەکییەکان چاپ بکرێت، کە لە ١١ی حوزەیرانی ٢٠٢٦وە دەستپێدەکات و بۆ ماوەی دە ڕۆژ بەردەوام دەبێت"، ئاماژەی بەوەش دا کە "ئەنجومەنی وەزیران بڕیاریدا بە تەرخانکردنی بڕە پارەیەک بۆ خەرجکردنی وەک شایستەی دارایی بۆ خێزانی شەهیدان و بریندارانی قوربانیی هێرشە سەربازییەکانی ئەم دواییەی سەر خاکی عێراق، بە قوربانییانی هەرێمی کوردستانی عێراقیشەوە".
هەروەها هاتووە: "بەهۆی بەردەوامی بارودۆخی نائاسایی لە ناوچەکە و دروستبوونی ئاستەنگ لەبەردەم جووڵەی تانکەرە نەوتییەکان، و بە مەبەستی زیادکردنی ئاستی هەناردەی نەوتی خاو، ئەنجومەنی وەزیران بڕیاریدا بە هەموارکردنەوەی بڕیارەکەی (ژمارە ١٢٠ی ساڵی ٢٠٢٦)، بۆ ئەوەی کۆمپانیای بەبازاڕکردنی نەوت (سۆمۆ) سەرپشک بکات بە هەموو دەسەڵاتەکان بۆ بەکارهێنانی میکانیزمە بەردەستەکانی بازاڕکردن، و پەسەندکردنی ئەو داواکارییانەی لەلایەن ئەو کۆمپانیایانەوە پێشکەش دەکرێن کە ئامادەیی خۆیان بۆ کڕین نیشان دەدەن، و ئەگەری دانوستانکردن لەسەر قبووڵکردنی تاکە پێشنیار، و چالاککردنی دەسەڵاتی وەزارەتی نەوت لە گرێبەستکردن لەگەڵ ئەو کۆمپانیایانەی پێشنیار بۆ کڕینی بڕی زیاتری نەوتی خاو پێشکەش دەکەن، بە مەرجێک پابەندبن بە یاساکانی عێراق و ڕێنماییەکانی وەزارەتی نەوت"، ئاماژەی بەوەش کرد کە "ئەنجومەن بەدواداچوونی بۆ کاروباری بەڕێوەبردنی دارایی کۆمپانیا گشتییەکان و فەرمانگەکانی خۆژێنی کرد، و ڕاسپاردەکانی لیژنەی فەرمانی دیوانی (ژمارە ٣٢ی ساڵی ٢٠٢٦)ی پەیوەست بە دانەوەی پشکی خەزێنەی پەسەند کرد".
لە درێژەی ڕاگەیەندراوەکەدا هاتووە: "لە بواری خزمەتگوزاریدا، ئەنجومەنی وەزیران فەرمانگەی ئاوی بەغدای سەر بە شارەوانی بەغدای سەرپشک کرد بۆ دابەشکردنی کارە کتوپڕەکان و کڕین و جێبەجێکردنیان، بە مەبەستی کورتکردنەوەی کات و ئەنجامدانی ئەم لایەنە خزمەتگوزارییە گرنگە بۆ دابینکردنی ئاو بۆ دانیشتووانی پایتەخت، هەروەها ڕەزامەندی دا لەسەر گرێبەستکردنی شارەوانی بەغدا بۆ کڕینی ماددەی (شەب و کلۆر) بۆ پڕۆژەکانی فەرمانگەی ئاو"، ئاماژەی بەوەش کرد کە "ئەنجومەنی وەزیران ڕەزامەندی دا لەسەر بەردەوامبوونی کارکردن بە بڕیارەکەی (ژمارە ٨٣٩ی ساڵی ٢٠٢٤) و ئەو لێخۆشبوونەی بە وەزارەتی ناوخۆ دراوە بۆ گرێبەستی ڕاستەوخۆ لەگەڵ سندوقی شەهیدانی پۆلیس، بۆ دابینکردنی پێداویستییە سەربازییەکان کە لە کارگەی بەرگدووینی سەر بە سندوقەکە و پێداویستییەکانی دیکە بەرهەم دەهێنرێن".
هەروەها جەختی کردەوە کە "ئەنجومەنی وەزیران ڕەزامەندی دا لەسەر یاداشتنامەی لێکتێگەیشتنی هاوبەشی نێوان وەزارەتی دەرەوەی عێراق و وەزارەتی دەرەوە و هاوکاری نێودەوڵەتی لیبیا، سەبارەت بە لێخۆشبوونی هاوبەش لە ڤیزای چوونەژوورەوە بۆ هەڵگرانی پاسپۆرتی دیپلۆماسی و خزمەتگوزاری و تایبەت"، ڕوونیشیکردەوە کە "ئەنجومەنی وەزیران ڕەزامەندی دا لەسەر ئەوەی ئەرکی دیوانی چاودێری دارایی لە ئەندامییەتی ئەو لیژنانەی کە بەپێی بڕیاری ئەنجومەن (ژمارە ١١١ی ساڵی ٢٠٢٦) پێکهێنراون، ئەرکێکی چاودێری نەک جێبەجێکردن بێت، و هاوکاری پێشکەش بکات لە بوارەکانی ژمێریاری و چاودێری و کارگێڕیدا".
ئاماژەی بەوەش کرد: "ئەنجومەن بەدواداچوونی بۆ جێبەجێکردنی بینای قوتابخانەکان کرد لە چوارچێوەی ئەرکەکانی فەرمانگەی پڕۆژە نیشتمانییەکانی بینای قوتابخانەکان، و ڕەزامەندی دا لەسەر جێبەجێکردنی پڕۆژەی قوتابخانەکانی ئەهوار، و هەڵوەشاندنەوەی ئەرکی لیژنەی فەرمانی دیوانی (ژمارە ٥٩ی ساڵی ٢٠١٦)، و هەموارکردنەوەی نرخەکان؛ چونکە پڕۆژەکە لە ساڵی ٢٠٠٧وە تۆمار کراوە، ئەمەش لە ڕێگەی هەماهەنگی نێوان هەردوو وەزارەتی پلاندانان و دارایی"، ئاماژەی بەوەش دا کە "ئەنجومەن بەدواداچوونی بۆ چۆنیەتی جێبەجێکردنی پڕۆژەی بینای نوێی سکرتارییەتی گشتی ئەنجومەنی وەزیران کرد، و کۆنووسی لیژنەی ناوەندی بۆ پێداچوونەوە و پەسەندکردنی پەسەند کرد، کە تێیدا هەموو ڕسووماتە گومرگییەکان خراوەتە ئەستۆی کۆمپانیای جێبەجێکار".
