جنێف – INA– زرغام زەکی
مستەفا سەنەد، وەزیری گەیاندنی عێراق، ئەمڕۆ پێنجشەممە، ڕایگەیاند کە بۆ یەکەمجار لە مێژوودا عێراق بۆ ئەندامێتی لە ئەنجومەنی یەکێتیی نێودەوڵەتیی گەیاندن (ITU) کاندید کراوە. هاوکات جەختی لە هەڵوێستی وڵاتەکەی کردەوە کە پێویستە "ژیریی دەستکرد" (AI) تەنها لە خزمەتی مرۆڤایەتیدا بەکاربهێنرێت و لە بواری سەربازیدا قەدەغە بکرێت.
وەزیری گەیاندن لە لێدوانێکی تایبەتدا بۆ ئاژانسی هەواڵی عێراقی (INA) ڕایگەیاند: "شاندی عێراق لە جنێف بەشداری لە چەندین کۆنفرانسی نێودەوڵەتیی تایبەت بە کەرتی گەیاندن و ژیریی دەستکرددا کردووە. لەوێدا هۆشداریمان داوە لە بەکارهێنانی ژیریی دەستکرد لە شەڕەکان و وەزارەتەکانی بەرگری و بۆ کوشتنی مرۆڤ؛ جەختمان کردووەتەوە کە نابێت مرۆڤ ببێتە دیلی ئەم ئامێرە زیرەکانە."
سەنەد ئاماژەی بەوەش کرد کە پێویستە ئەم تەکنەلۆژیا نوێیە لە بوارەکانی کشتوکاڵ، پزیشکی، گەشەپێدان و خزمەتکردنی خێزان و منداڵدا بەکاربهێنرێت. سەبارەت بە کاندیدبوونی عێراقیش وتی: "ڕێککەوتنمان لەگەڵ نزیکەی ٩٠ دەوڵەتدا کردووە بۆ دەنگدانی یەکتر بە مەبەستی پاڵپشتیکردنی کاندیدبوونی عێراق بۆ ئەندامێتی ئەنجومەنی یەکێتیی نێودەوڵەتیی گەیاندن، کە لە ئەگەری سەرکەوتندا، دەبێتە یەکەمجار لە مێژووی وڵاتدا کە ئەو پۆستە بەدەست بهێنێت."
لە لایەکی دیکەوە، بلاسم سالم، سەرۆکی ئەنجومەنی کۆمیسیارانی دەستەی ڕاگەیاندن و گەیاندن بە (INA)ی ڕایگەیاند: "شاندی دەستەکە لە چەندین وۆرکشوپ و کۆنفرانسی پسپۆڕی لە جنێف بەشدار بووە و لەگەڵ وەزیرانی گەیاندنی وڵاتانی جیهان کۆبووەتەوە. ئامانجمان ئامادەکردنی ڕێککەوتنامەی هاوبەشە بۆ پەرەپێدانی کەرتی گەیاندن و خێراکردنی پرۆسەی گۆڕانکاریی دیجیتاڵیلە عێراقدا."
هاوکات دکتۆر سەیوان بارزانی، باڵیۆزی عێراق لە نەتەوە یەکگرتووەکان، جەختی لە گرنگیی ئەم بەشدارییە فراوانەی عێراق کردەوە و وتی: "ئەم لوتکەیە کە بە سەرپەرشتی سکرتێری گشتیی نەتەوە یەکگرتووەکان و یەکێتیی نێودەوڵەتیی گەیاندن بەڕێوەدەچێت، دەرفەتێکی گەورەیە بۆ عێراق تاوەکو لە مەیدانە نێودەوڵەتییەکاندا ئامادەیی هەبێت و دەنگی خۆی بگەیەنێتە کۆمەڵگەی نێودەوڵەتی، بەتایبەت لە بوارەکانی تەکنەلۆژیا و حوکمڕانیی ژیریی دەستکرددا."
شایەنی باسە چالاکییەکانی "دیالۆگی جیهانی بۆ حوکمڕانیی ژیریی دەستکرد" لە ڕۆژی دووشەممەی ڕابردووەوە لە بارەگای (ITU) لە شاری جنێفی سویسرا دەستی پێکردووە و تاوەکو ١٠ی ئەم مانگە بە بەشداریی سەرکردە و وەزیرانی زۆربەی وڵاتانی جیهان بەردەوام دەبێت.