بەدواداچوون – INA
لیژنەی هاوبەشی عومان و ئێران یەکەمین کۆبوونەوەی خۆی لە مەسقەت سەبارەت بە گەرووی هورمز ئەنجامدا، و هاوکات جەختی لە پابەندبوون بە یاسای نێودەوڵەتی کردەوە لە دەریاوانی و خزمەتگوزارییە دەریاییەکان لە گەرووی هورموزدا.
وەزارەتی دەرەوەی عومان ڕایگەیاند: "لیژنەی هاوبەشی عومان و ئێران یەکەمین کۆبوونەوەی خۆی سەبارەت بە گەرووی هورمز لە مەسقەت سازکرد"، و ڕوونیشی کردەوە کە "لیژنەکە تاووتوێی بیروڕاکانی کردووە سەبارەت بە بەڕێوەبردنی داهاتووی گەرووەکە".
وەزارەتی دەرەوە زیاتری خستەڕوو: "هەردوو لایەنی عومانی و ئێرانی باسیان لە ڕێگاکانی بەهێزکردنی هەماهەنگی کردووە لەسەر ئەو بابەتانەی پەیوەستن بە گەرووی هورمزەوە، و جەختیان لە پابەندبوون بە یاسای نێودەوڵەتی کردووەتەوە لە دەریاوانی و خزمەتگوزارییە دەریاییەکان لە هورمز"، هاوکات پێداگریشی کردووە لەسەر "پاڵپشتیکردنی جێبەجێکردنی بەندەکانی ئەو یاداشتنامەی لێکتێگەیشتنەی کە لە نێوان ئێران و ویلایەتە یەکگرتووەکاندا واژۆ کراوە".
وەزیری دەرەوەی عومان، بەدر ئەلبوسەعیدی، لە لێدوانێکدا کە ئاژانسی هەواڵی عێراقی (INA) بەدواداچوونی بۆ کردووە، جەختی کردەوە: "سەڵتەنەتی عومان بەردەوامە لە پەیوەندی و هەوڵەکانی بۆ بەدیهێنانی ئاشتی و لێکتێگەیشتن و تەبایی"، و دووپاتیشی کردەوە لەسەر "پەرۆشیی سەڵتەنەتی عومان بۆ ئەوەی دەریاوانی لە گەرووی هورمزدا بە پارێزراوی و ئازادی بۆ هەمووان بمێنێتەوە".
وتیشی: "هەر لێکتێگەیشتنێک سەبارەت بە گەرووەکە پێویستە لە چوارچێوەی ڕێساکانی یاسای نێودەوڵەتیدا بمێنێتەوە"، ئاماژەی بەوەش کرد کە "پابەندبوون هەیە بە ڕێککەوتننامەی یاسای دەریاکان و سازانێک لەگەڵ ئێراندا هەیە بۆ ئەوەی هیچ ڕێکخستنێک لە دەرەوەی چوارچێوەی ئەو ڕێککەوتننامەیەدا نەبێت".