بەغداد – INA
وەزارەتی تەندروستی، ئەمڕۆ چوارشەممە، لەناوبردنی نزیکەی ٢٣٩ کگم لە ماددەی هۆشبەر و کارتێکەرە عەقڵییەکانی لە فەرمانگەی پزیشکی دادی لە بەغداد ڕاگەیاند.
لە بەیاننامەیەکی وەزارەتەکەدا کە بۆ ئاژانسی هەواڵی عێراقی ناردووە، دەڵێت: "بە ڕێنمایی و سەرپەرشتی وەزیری تەندروستی عەبدولحوسێن موسەوی، سەرۆکی دەستەی نیشتمانیی باڵای کاروباری ماددە هۆشبەرەکان و کارتێکەرە عەقڵییەکان، لیژنەی لەناوبردن هەستا بە پشکنین و لەناوبردنی بڕێک لە ماددە هۆشبەرەکان و کارتێکەرە عەقڵییە پارێزراوەکان لە فەرمانگەی پزیشکی دادی، کە کۆی گشتییان گەیشتە نزیکەی ٢٣٩ کیلۆگرام لە جۆرە جیاوازەکانی ماددەی هۆشبەر، و ١٣٨٨ حەبی کارتێکەری عەقڵی، لەگەڵ ٢٠٢ شووشە کە ماددەی کۆداینی تێدابوو".
ڕوونیشیکردەوە: "پرۆسەی لەناوبردنەکە بە سەرپەرشتی لیژنەیەکی پسپۆڕ بە سەرۆکایەتی نوێنەری ئەنجومەنی باڵای دادوەری، دادوەر یاسر فەنتێل خەزاعی، و بە ئامادەبوونی بەڕێوەبەری گشتی فەرمانگەی پزیشکی دادی، زەید عەلی عەباس، و ئەندامانی لیژنەکە لە نوێنەرانی ئەمینداریەتی گشتی ئەنجومەنی وەزیران، بەڕێوەبەرایەتی گشتی گومرک، بەڕێوەبەرایەتی گشتی کاروباری ماددە هۆشبەرەکان، و فەرماندەیی هێزەکانی سنوور بەڕێوەچوو".
هاوكات دادوەر خەزاعی رایگەیاند: "پرۆسەی لەناوبردنەکە لەنێو کورەی تایبەتدا ئەنجامدرا کە پلەی گەرمییەکەی دەگاتە ١٠٠٠ پلەی سەدی، بەشێوەیەک کە لەناوبردنی تەواوەتی ماددەکان و گۆڕینیان بۆ خۆڵەمێشێکی خاڵی لە هەر کاریگەرییەکی کیمیایی مسۆگەر دەکات"، ئاماژەی بەوەش دا: کە "لیژنەکە بەردەوامە لە کارەکانی بەمەبەستی خێراکردنی لەناوبردنی ئەو ماددە هۆشبەرانە، کارتێکەرە عەقڵییانە و پێشەنگە کیمیاییانەی کە لەلایەن لایەنە ئەمنییەکانەوە دەستیان بەسەردا دەگیرێت".
ئەوەشی خستەڕوو: "ئەم هەنگاوە لە چوارچێوەی هەوڵەکانی وەزارەتی تەندروستیدا دێت بۆ جێبەجێکردنی بەرنامەی حکومەت و داڕشتنی میکانیزمێک بۆ بەرەنگاربوونەوەی ماددە هۆشبەرەکان وەک لە پێشینەیەکی نیشتمانی، و کەمکردنەوەی مەترسی ئەم ماددانە لەسەر کۆمەڵگە".