دیوانییە – INA - سەفات ئەلعەزاوی
ئەمڕۆ دووشەممە، فەرمانگەی تەندروستیی دیوانییە، ئەنجامدانی کەمپینێکی چاودێری بۆ سەر ئەو شوێنە بازرگانییانە ڕاگەیاند کە سەرپێچیی مەرجە تەندروستییەکانیان کردووە، هاوكات ئاماژەی بەوەش کرد کە کەمپینەکە بووەتە هۆی لەناوبردنی 30 تۆن ماددەی خۆراکیی ماوەبەسەرچوو.
بەڕێوەبەری فەرمانگەی تەندروستیی دیوانییە، موهەند ئەنعیم ئەلمەیالی، بە ئاژانسی هەواڵی عێراقی (INA)ی ڕاگەیاند: "بەشی چاودێریی تەندروستی لە دیوانییە، کەمپینێکی بۆ داخستنی ئەو شوێنە بازرگانییانە ئەنجامدا کە سەرپێچیی مەرجە تەندروستییەکانیان کردووە، لەگەڵ ژمارەیەک چێشتخانە و فڕن"، ئاماژەی بەوەش کرد کە "30 تۆن ماددەی خۆراکیی ماوەبەسەرچوو بە هاوبەشی لەگەڵ دەزگای ئاسایشی نیشتمانی لەناو بردران".
ئاماژەی بەوەشکرد: "تیمە مەیدانییەکان هەستان بە لەناوبردنی ماددە خۆراکییەکان لە سەرچاوەکەیانەوە، و وەرگرتنی نموونەی خۆراکی و ناردنیان بۆ تاقیگەی تەندروستیی گشتی، لەگەڵ گرتنەبەری ڕێکاری یاسایی بەرامبەر خاوەنەکانیان لە پێناو پاراستنی تەندروستیی گشتی و سەلامەتیی هاووڵاتییاندا".
ڕوونیشی کردەوە: "کەمپینەکە بە ئامانجی بەدواداچوون بۆ سەلامەتیی ماددە خۆراکییەکان و ڕادەی پابەندبوون بە ڕێنماییە تەندروستییەکان و ڕێگریکردن لە سەرپێچیکردنە سەر تەندروستیی گشتی بەڕێوەچوو".