بەغداد- INA
نوێنەری مەرجەعیەتی باڵای ئاینی، شێخ عەبدولمەهدی کەربەلایی، ئەمڕۆ سێشەممە جەختی کردەوە کە مەرجەعیەت کۆمەڵێک ڕاسپاردەی ئاڕاستەی وتاربێژان، بانگخوازان، شاعیران و مداحەکان کردووە بۆ بەدیهێنانی ئامانجی باڵای مینبەری حوسێنی، و ڕوونیشیکردەوە کە یەکێک لە ڕاسپاردەکان بریتییە لە دوورکەوتنەوە لە خستنەڕووی هەر بابەتێک کە ببێتە هۆی دروستبوونی لێکترازان و جیاوازی لە نێوان بڕواداراندا.
شێخ کەربەلایی لە وتارێکدا لە کاتی ڕێوڕەسمی گۆڕینی ئاڵای گومبەزی ئیمام حوسێن و براکەی حەزرەتی عەباس (سەلامی خوایان لێبێت) بە بۆنەی هاتنەوەی مانگی موحەڕەمی حەرام، کە ئاژانسی هەواڵی عێراقی (INA) بەدواداچوونی بۆ کردووە، ڕایگەیاند: "پێویستە لەسەرمان نەتەوەیەک (ئوممەتێک) بنیات بنێین کە تێگەیشتنی بۆ قوتابخانەی عاشورا هەبێت".
وتیشی: "ڕێوڕەسم و دروشمە ئاینییەکان (الشعائر) هۆکارێکن کە بمانگەیەننە ئامانجی تەقوا و لەخواترسان".
ئاماژەی بەوەش دا کە "مەرجەعیەتی باڵای ئاینی بایەخێکی تایبەتی بە مینبەری حوسێنی داوە بۆ بەدیهێنانی ئامانجە هەرە باڵاکان".
ڕوونیشیکردەوە کە "یەکێک لە ڕاسپاردەکانی مەرجەعیەتی باڵای ئاینی، خۆڕازاندنەوەیە بە ڕەوشت و ئادابەکانی ئیمام حوسێن (سەلامی خوای لێبێت)".
شێخ عەبدولمەهدی کەربەلایی جەختی کردەوە کە "یەکێک لە ڕاسپاردە سەرەکییەکانی مەرجەعیەتی باڵای ئاینی، دوورکەوتنەوەیە لە خستنەڕووی هەر شتێک کە ناکۆکی، دووبەرەکی و جیاوازی لە نێوان بڕواداراندا بنێتەوە".