نێودەوڵەتی – INA
شێخ تەمیم بن حەمەد ئال سانی، ئەمیری دەوڵەتی قەتەر، لە پەیوەندییەکی تەلەفۆنیدا لەگەڵ دۆناڵد ترامپ، سەرۆکی ئەمریکا، دوایین پێشهاتەکانی هەوڵە دبلۆماسییەکانی تایبەت بە کەمکردنەوەی گرژییەکانی لە ناوچەکەدا تاوتوێ کرد، وەک ئەوەی دیوانی ئەمیری قەتەر ڕایگەیاندووە.
دیوانی ئەمێری لە بەیاننامەیەکدا ئاماژەی بەوە کردووە، هەردوولا پێداچوونەوەیان بە ئەنجامی ڕاوێژکاری و لێکتێگەیشتنە بەردەوامەکانی نێوان ویلایەتە یەکگرتووەکانی ئەمریکا و ئێران لە چوارچێوەی ڕەوتی دانوستانەکاندا کردووە، کە بوونەتە هۆی بەدەستهێنانی پێشکەوتن لە چەندین لێکتێگەیشتنی خراوەڕوودا.
ئهوهیش هاتووه كه، سەرۆکی ئەمریکا لە کاتی پەیوەندییەکەدا جەختی کردووەتەوە کە لێکتێگەیشتنەکانی نێوان ئەمریکا و ئێران ڕەزامەندی سەرجەم لایەنە پەیوەندیدارەکانی بەدەستهێناوە، و لەلایەن چەندین وڵاتی برا و دۆستەوە پشتیوانی لێکراوە کە قەتەریش یەکێکیانە، هاوکات ئاماژەی بە بەردەوامیی هەوڵەکان کردووە بۆ تەواوکردنی ڕێکارە کۆتاییەکان بە مەبەستی ئامادەکاری بۆ ڕاگەیاندنی ڕێوشوێنە تایبەتەکانی واژۆکردنی ڕێککەوتنەکە.
لەلای خۆشییەوە، ئەمیری قەتەر پێشوازی وڵاتەکەی لەو هەوڵانە دەربڕی کە ئامانجیان چارەسەرکردنی ناکۆکییەکانە لە ڕێگەی گفتوگۆ و ئامرازە ئاشتییانییەکانەوە، و جەختی لە پاڵپشتی دەوڵەتی قەتەر کردەوە بۆ هەر هەنگاوێک کە ببێتە هۆی بەهێزکردنی ئاسایش و سەقامگیری هەرێمی و نێودەوڵەتی و چەسپاندنی ئاشتی و هاوکاری لە ناوچەکەدا.