بەغداد – INA
وەزارەتی پەروەردە، ئەمڕۆ هەینی، جەختی کردەوە کە ئەو دەفتەر و نموونە ئەزموونیانەی (تاقیکردنەوەکان) لە فڕۆکەخانەی بەغداد دەستیان بەسەردا گیراوە، پەیوەندییان بە ئەزموونە وزارییەکانی ساڵی خوێندنی (٢٠٢٥-٢٠٢٦)ـەوە نییە، و هیچ پەیوەندییەکیان بە پرسیار یان دەفتەرەکانی تاقیکردنەوە گشتییە بەڕێوەچووەکانەوە نییە.
وەزارەت لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "پشتبەستن بەوەی لەلایەن لایەنە ئەمنییەکانەوە هاتووە سەبارەت بە دەستبەسەرداگرتنی کۆمەڵێک پەڕاو کە گومانیان لێدەکرێت پەیوەندییان بە پرۆسەی تاقیکردنەوەکانەوە هەبێت، لایەنی یاسایی لە وەزارەت چاوی بەو پەڕاوانەدا گێڕایەوە و وردبینی سەرەتایی بۆ کردن، پاشان بابەتەکە خرایە بەردەم لیژنەی هەمیشەیی تاقیکردنەوەکان بە مەبەستی ئەنجامدانی هاوتاکردن و وردبینییە تەکنیکییە پێویستەکان."
ئهوهیش هاتووه كه: "لەسەر ئەم بنەمایە، لیژنەی هەمیشەیی تاقیکردنەوەکان کۆبوونەوەیەکی بۆ ئەم مەبەستە ئەنجامدا، و دوای وردبینیکردنی پەڕاوە دەستبەسەرداگیراوەکان و بەراوردکردنیان بەو دەفتەر و نموونە ئەزموونیانەی کە پەسەندکراون، دەرکەوت کە ئەو پەڕاوانە تایبەت نین بە ئەزموونە وزارییەکانی ساڵی خوێندنی (٢٠٢٥-٢٠٢٦)، و هیچ پەیوەندییەکیان بە پرسیار یان دەفتەرەکانی تاقیکردنەوە گشتییە بەڕێوەچووەکانەوە نییە."
وەزارەت جەختیشی کردەوە کە "دۆسیەی تاقیکردنەوە گشتییەکان و سەلامەتی ڕێکارەکانی، جێگەی بەدواداچوون و گرنگیپێدانی ڕاستەوخۆی جەنابی سەرۆکی ئەنجومەنی وەزیرانە، سەرەڕای بەدواداچوونی مەیدانی و کەسیی بەردەوام لەلایەن وەزیری پەروەردەوە، کە بە شێوەیەکی ڕاستەوخۆ سەرپەرشتی بەڕێوەچوونی پرۆسەی تاقیکردنەوەکان دەکات و ڕێکاری پێویست دەگرێتەبەر بۆ دابینکردنی ژینگەیەکی ئەزموونیی ئارام و تۆکمە، بە جۆرێک کە مافی قوتابیان بپارێزرێت و پاکی و بێگەردی تاقیکردنەوە گشتییەکان بپارێزێت، هاوکات لەگەڵ بەردەوامبوونی هەماهەنگی لەگەڵ لایەنە ئەمنییەکان و لایەنە پەیوەندیدارەکان بۆ بەدواداچوونی هەر زانیاری یان ئاماژەیەک کە ڕەنگە کار بکاتە سەر بەڕێوەچوونی پرۆسەی تاقیکردنەوەکان."
وەزارەتی پەروەردە ستایشی ئەو هەوڵە گەورانەی کرد کە دەزگا ئەمنییەکان دەیدەن لە پاراستنی پرۆسەی تاقیکردنەوەکان و ڕاوەدوونانی هەر هەوڵێک کە زیان بە پرۆسەکە بگەیەنێت یان ببێتە هۆی شڵەژانی قوتابیان و خێزانەکانیان، جەختیشی لە بەردەوامیی هاوکاری و هەماهەنگی هاوبەش کردەوە بە شێوەیەک کە متمانە بە ڕێکارە گیراوەبەربەرەکان بەهێزتر بکات و پێگەی زانستی تاقیکردنەوە گشتییەکان بپارێزێت.
وەزارەت پەیامێکی دڵنیایی ئاراستەی قوتابیانی ئازیز و خێزانە بەڕێزەکانیان کرد، کە تاقیکردنەوە گشتییەکان بە ئاستێکی بەرزی ڕانیی و بەپێی ڕێکاری ڕێکخراوەیی، ئەمنی و تەکنیکی ورد بەڕێوەدەچن، و سەرجەم لایەنە پەیوەندیدارەکان بە ڕۆحیەتی یەک تیم کار دەکەن بۆ دەستەبەرکردنی سەرکەوتنی پرۆسەی تاقیکردنەوەکان و دابینکردنی کەشێکی گونجاو بۆ ئەنجامدانی تاقیکردنەوەکان بە دادپەروەری و شەفافییەت، بە جۆرێک کە مافی سەرجەم قوتابیان بپارێزرێت و پاداشتی هەوڵە زانستییەکانیان بدرێتەوە، وەزارەتیش هیچ هەوڵێک درێغی ناکات لە گرتنەبەری هەر شتێک کە پاڵپشتی پاکی تاقیکردنەوەکان بکات و داهاتووی قوتابیان بپارێزێت.
وەزارەتی پهروهرده داوای لە دەزگاکانی ڕاگەیاندن و تۆڕە کۆمەڵایەتییەکان کرد کە وردبن لە گواستنەوەی هەواڵ و زانیارییەکان، و پشت بە سەرچاوە فەرمییەکانی وەزارەت ببەستن بۆ وەرگرتنی هەواڵەکانی تایبەت بە تاقیکردنەوە گشتییەکان، و نەکەونە داوی دەنگۆ یان زانیارییە بێبنەماکان کە ڕەنگە کاریگەری نەرێنی بکەنە سەر باری دەروونی قوتابیان و خێزانەکانیان.