بەغداد – INA
ئەمڕۆ سێشەممە، وەزارەتی دەرەوە هەڵبژاردنی عێراقی وەک جێگری سەرۆکی کۆمەڵەی گشتیی نەتەوە یەکگرتووەکان بۆ خولی هەشتا و یەکەمین ڕاگەیاند.
وەزارەتی دەرەوە لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه :"کۆمەڵەی گشتیی نەتەوە یەکگرتووەکان، عێراقی وەک جێگری سەرۆکی کۆمەڵەی گشتیی نەتەوە یەکگرتووەکان بۆ خولی هەشتا و یەکەمین هەڵبژارد، ئەمەش لە میانەی ئەو هەڵبژاردنانەی کە کۆمەڵەی گشتی لە بارەگای نەتەوە یەکگرتووەکان لە شاری نیویۆرک ئەنجامی دان."
راگهیندراوهكه ئاماژەی بەوەش کردووە کە: "ئەم هەڵبژاردنە ڕەنگدانەوەی ئەو متمانەیەیە کە عێراق لەلای نەتەوە یەکگرتووەکان و کۆمەڵگەی نێودەوڵەتیدا هەیەتی، و پێزانینە بۆ هەوڵەکانی لە پشتگیریکردنی هاوکاریی نێوان وڵاتانی باشوور و هاوکاریی سێقۆڵی، لە ڕێگەی گرتنەئەستۆی ڕۆڵی ئاسانکار لەم بوارەدا، بە شێوازێک کە بەشداربووە لە بەهێزکردنی تەبایی نێوان وڵاتانی تازەپێگەیشتوو و داکۆکیکردن لە کارە لەپێشینەکانیان لەناو نەتەوە یەکگرتووەکاندا، و پێگەی خۆی وەک هاوبەشێکی کارا لە پێشخستنی ئەجێندای گەشەپێدان و هاوکاریی نێودەوڵەتیدا بەهێزتر کردووە."
لە راگهیندراوهكهدا جەخت کراوەتەوە کە: "عێراق لە ڕێگەی ئەم پۆستەوە، چاوەڕوانە بە کارایی بەشداربێت لە پشتگیریکردنی هەوڵەکانی نەتەوە یەکگرتووەکان کە ئامادەکراون بۆ بەدیهێنانی ئامانجەکانی گەشەپێدانی بەردەوام بۆ ساڵی ٢٠٣٠، و بەشداریکردن لە پەرەپێدانی شێوازەکانی کاری کۆمەڵەی گشتی و بەرزکردنەوەی کاراییەکەی، سەرڕای بەهێزکردنی ڕۆڵ و پێگەی عێراق لە گۆڕەپانی نێودەوڵەتیدا."
ههروهها ئهوهیش هاتووه: "ئەم دەستکەوتە بەرهەمی ئەو سیاسەتە دەرەوە هاوسەنگ و میانڕەوەی عێراقە کە حکومەتی عێراق پەیڕەوی دەکات، و دەرئەنجامی ئەو هەوڵە دیپلۆماسییانەیە کە وەزارەتی دەرەوە سەرکردایەتی دەکات بە هەماهەنگی لەگەڵ نوێنەرایەتی هەمیشەیی کۆماری عێراق لە نەتەوە یەکگرتووەکان لە نیویۆرک."
لە کۆتاییدا ئاماژە بەوە کراوە کە: "هەڵبژاردنی عێراق وەک جێگری سەرۆکی کۆمەڵەی گشتیی نەتەوە یەکگرتووەکان بۆ خولی هەشتا و یەکەمین، دەستکەوتێکی دیپلۆماسی گرنگە کە پێگەی وڵات لەناو سیستمی نەتەوە یەکگرتووەکاندا بەهێز دەکات، و جەخت لەسەر ڕۆڵی گەشەسەندووی دەکاتەوە لە پشتگیریکردنی گفتوگۆ و هاوکاریی نێودەوڵەتی و چەسپاندنی بنەماکانی کاری فرەلایەنە."