بەدواداچوون – INA
ڕاپۆرتێک کە ماڵپەڕی "ئەکسیۆس" بڵاویکردووەتەوە، پەردەی لەسەر دانوستانێکی پێشکەوتوو لادا کە ئێستا لە نێوان واشنتۆن و تاراندا بەڕێوەدەچێت سەبارەت بە ڕەشنووسی ڕێککەوتنێکی سێ لاپەڕەیی، کە ئامانجی کۆتاییهێنانە بە ڕووبەڕووبوونەوە سەربازییەکانی ئێستا، تێیدا سەفقەی "کاش بەرامبەر یۆرانیۆم" وەک گرنگترین کۆڵەکەی ئەم جوڵە دیپلۆماسییە دەردەکەوێت.
بەپێی وتەی بەرپرسانی ئەمریکی و سەرچاوە ئاگادارەکان بۆ ماڵپەڕەکە، ئیدارەی سەرۆک دۆناڵد ترەمپ لێکۆڵینەوە لە ئازادکردنی 20 ملیار دۆلار لە داراییە بلۆککراوەکانی ئێران دەکات، بەرامبەر بەوەی تاران بە تەواوەتی دەستبەرداری کۆگای یۆرانیۆمی پیتێنراوی خۆی ببێت، بەتایبەتی ئەو 450 کیلۆگرامەی کە بە ڕێژەی پاکی 60% پیتێنراوە؛ ئەمەش وەک هەوڵێک بۆ بەدەستهێنانی سازشی ئەتۆمی کە گەرەنتی ئەوە بکات ئێران نەگاتە ئاستی بەرهەمهێنانی چەکی ئەتۆمی، وەک لە دەقی ڕاپۆرتەکەدا هاتووە.
دزەپێکراوەکان ئاماژە بەوە دەکەن کە ئەو دانوستانانەی بە نێوەندگیری پاکستان و پاڵپشتی میسر و تورکیا بەڕێوەدەچن، ئەم هەفتەیە پێشکەوتنی بەرچاویان بەخۆوە بینیوە، سەرەڕای مانەوەی جیاوازیی گەورە سەبارەت بە ماوەی ڕاگرتنی پیتاندن؛ چونکە واشنتۆن داوای مۆڵەتێک دەکات کە دەگاتە 20 ساڵ، لە کاتێکدا تاران پێشنیازی تەنها 5 ساڵ دەکات.
هەروەها ڕەشنووسەکە بەپێی "ئەکسیۆس" چەند بڕگەیەک لەخۆدەگرێت، لەوانە؛ گواستنەوەی بەشێک لە کۆگا ئەتۆمییەکە بۆ وڵاتێکی سێیەم، هەڵوەشاندنەوەی دامەزراوە قایمکراوەکانی ژێر زەوی، هێشتنەوەی چالاکییە توێژینەوەییەکان بۆ مەبەستی پزیشکی تەنها لە دامەزراوەکانی سەر زەوی و لەژێر چاودێرییەکی توندی نێودەوڵەتیدا.