بەغدا – INA
وەزارەتی کارەبا، ئەمڕۆ پێنجشەممە، ڕایگەیاند کە وەستانی دابینکردنی غاز لە کێڵگەی "دانە" لە هەرێمی کوردستان، ڕەنگە ببێتە هۆی کەمبوونەوەی ١٤٠٠ مێگاوات لە توانای بەرهەمهێنانی تۆڕی کارەبای نیشتمانی.
ئەحمەد تورکی جیاد، وتەبێژی فەرمیی وەزارەتی کارەبا، لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: "وەزارەت ئاگادارکراوەتەوە کە بەهۆی ئەو بارودۆخە ئەمنییەی لە ناوچەکەدا ڕوویداوە، دابینکردنی غاز لە کێڵگەی دانە وەستاوە؛ ئەمەش لە حاڵەتی بەردەوامبوونیدا دەبێتە هۆی لەدەستدانی نزیکەی ١٤٠٠ مێگاوات لە توانای وێستگەکانی بەرهەمهێنان."
وتەبێژەکە جەختی کردەوە: "وەزارەت دەستی کردووە بە گرتنەبەری سەرجەم ڕێکارە تەکنیکییەکان و پلانێکی فریاگوزاریی بۆ بەڕێوەبردنی سیستەمی کارەبا ئامادە کردووە، ئەویش لە ڕێگەی سەرلەنوێ دابەشکردنەوەی بارگرانییەکان و بەکارهێنانی هەموو یەکە بەرهەمهێنەرە بەردەستەکان، بە مەبەستی کەمکردنەوەی کاریگەریی ئەو کورتهێنانە و پاراستنی سەقامگیریی تۆڕی کارەبا."
هەر بەگوێرەی ڕاگەیەندراوەکە، وەزارەتی کارەبا لە هەماهەنگیی بەردەوامدایە لەگەڵ لایەنە پەیوەندیدارەکان بۆ چاودێریکردنی دۆخەکە و گەڕانەوەی وێستگەکان بۆ دۆخی ئاسایی. هاوکات داواشی لە هاووڵاتییان کرد لەم ماوەیەدا هاوکار بن لە دەستپێوەگرتن بە بەکارهێنانی وزەی کارەبا.
