بەغداد - INA
وەزارەتی جەنگی ئەمریکا جەختیکردەوە: کۆتاییھێنان بە ئەرکی ھاوپەیمانی نێودەوڵەتی لە عێراق لە کۆتایی مانگی ئەیلوولی داھاتوودا دەبێت.
وەزارەتەکە لە بەیاننامەیەکدا کە بۆ ئاژانسی ھەواڵی عێراقی نێرداوە، ڕایگەیاند: "وەزیری جەنگ پیت هیگسێس، لە پێنتاگۆن - لە دوای کۆبوونەوەکانی لە نووسینگەی هێلکەیی، لەگەڵ عەلی زەیدی سەرۆک وەزیرانی عێراق کۆبووەوە، بۆ تاوتوێکردنی ھاوپەیمانی نێودەوڵەتی بۆ تێکشکاندنی ڕێکخراوی 'داعش'، و کۆتاییھێنان بە ئەرکی ئۆپەراسیۆنی 'نەبەردی پۆڵایین' (Operation Inherent Resolve) لە عێراقەوە، ھەروەھا داهاتووی پەیوەندییەکانی نێوان ئەمریکا و عێراق".
بەپێی بەیاننامەکە، وەزیر هیگسێس جارێکی دیکە جەختی لەسەر "پەرۆشی ویلایەتە یەکگرتووەکان کردەوە بۆ جێبەجێکردنی تەواوی ئەو بەیاننامە هاوبەشەی کە لە ئەیلوولی ٢٠٢٤دا دەرچوو، کە تێیدا خشتەی کاتی بۆ کۆتاییھێنان بە ئەرکی سەربازیی ھاوپەیمانی نێودەوڵەتی بۆ تێکشکاندنی 'داعش' لە عێراق، و کۆتاییھێنان بە ئەرکی ئۆپەراسیۆنی 'نەبەردی پۆڵایین' کە لە عێراقەوە کار دەکات تاوەکو ٣٠ی ئەیلوول ڕاگەیەندرا بوو".
وەزیر پێشوازیی کرد لەو "دەستپێشخەرییەی کە حکومەتی عێراق سەرکردایەتی دەکات بۆ کۆنترۆڵکردن و سنووردارکردنی چەک، بە مەبەستی چەسپاندنی سەروەریی عێراق و دەسەڵاتی سەرکردایەتییە دیمۆکراتییە باڵاکەی بەسەر سەرجەم لایەنە چەکدارەکاندا".
