بەغداد - INA
وەزیری کارەبا، عەلی سەعدی وەهیب، لە میانی کۆبوونەوەیەکدا لەگەڵ جێگری وەزیری وزەی ئەمریکا، جەیمس دانلی، جەختی کردەوە کە عێراق دەیەوێت بەردەوام بێت لەسەر هاوبەشییەکانی و فراوانتریان بکات لەگەڵ کۆمپانیا گەورەکانی وزەی جیهاندا.
وەهیب لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "لە کۆبوونەوەیەکی هاوبەشدا لە واشنتۆنی پایتەختی ئەمریکا، لەگەڵ وەزیری نەوتی عێراق و جێگری وەزیری وزەی ئەمریکا جەیمس دانلی کۆبووینەوە، و تاوتوێی ڕێگاکانی بەهێزکردنی هاوکاریی نێوان عێراق و ویلایەتە یەکگرتووەکانمان کرد لە کەرتی وزەدا؛ هاوکات جەختمان لەسەر خواستی عێراق کردەوە بۆ بەردەوامبوون و فراوانکردنی هاوبەشی لەگەڵ کۆمپانیا گەورەکانی وزەی جیهاندا و لە پێشەنگیشیاندا کۆمپانیای GE، بە شێوازێک کە بەشدار بێت لە پەرەپێدانی سیستەمی کارەبا و زیادکردنی توانای نوێی بەرهەمهێنان. هەروەها ڕوونمان کردەوە کە جێبەجێکردنی پڕۆژەکانی فراوانکردن، بەستراوەتەوە بە دابینکردنی سووتەمەنی پێویست و هەمەجۆرکردنی سەرچاوەکانی دابینکردنی گاز، بە مەبەستی زامنکردنی بەردەوامیی کارکردنی وێستگەکانی بەرهەمهێنان و بەرزکردنەوەی کارایی سیستەمی نیشتمانی."
ئهوهیش وت كه: "کۆبوونەوەکە تیشکی خستە سەر گرنگیی پاڵپشتی لایەنی ئەمریکی بۆ داواکارییەکەی عێراق سەبارەت بە هاوردەکردنی گاز لە تورکمانستانەوە، وەک یەکێک لە بژاردە گرنگەکان بۆ هەمەجۆرکردنی سەرچاوەکانی گاز و بەهێزکردنی ئاسایشی وزە. دابینکردنی ئەم پێداویستییانە دەبێتە هۆی دووبارە خستنەگەڕی وێستگە وەستاوەکان یان ئەو وێستگانەی کە بەهۆی کەمیی گازەوە کەمتر لە توانای دیزاینکراوی خۆیان کار دەکەن، جگە لە زیادکردنی توانای نوێی بەرهەمهێنان بۆ تۆڕی نیشتمانی، ئەمەش بە شێوازێکی ئەرێنی لەسەر کاتژمێرەکانی پێدانی کارەبا بە هاووڵاتییان ڕەنگ دەداتەوە."
باسی لەوەش کرد: "دووبارە جەختمان کردەوە کە عێراق هەوڵ بۆ بنیاتنانی هاوبەشیی ستراتیژی و بەردەوام دەدات، لەگەڵ ڕەخساندنی ژینگەیەکی گونجاو بۆ وەبەرهێنانی کۆمپانیا جیهانییەکان، بە جۆرێک خزمەت بە بەرژەوەندییە هاوبەشەکان بکات و پاڵپشتی لە سەقامگیریی سیستەمی وزە و دابینکردنی خواستی ڕوو لە زیادبوونی سەر کارەبا بکات."
لەم نێوەندەشدا، وەزیری نەوت باسم محەمەد خزەیر عەبادی، لەگەڵ جێگری وەزیری وزەی ئەمریکا جەیمس دانلی، ئاسۆکانی هاوکاریی هاوبەشیان لە بواری وزەدا تاوتوێ کرد.
وەزارەتی نەوت لەراگەیندراوەكەدا كه بۆ ئاژانسی هەواڵی عێراقی(INA) نێردراوه تێیدا هاتووه : "وەزیری نەوت باسم محەمەد خزەیر عەبادی، لەگەڵ جێگری وەزیری وزەی ئەمریکا جەیمس دانلی کۆبووەوە، بە ئامادەبوونی وەزیری کارەبا عەلی سەعدی وەهیب، بەڕێوەبەری گشتیی کۆمپانیای نەوتی بەسرە باسم عەبدولکەریم، و بەڕێوەبەری گشتیی کۆمپانیای بەبازاڕکردنی نەوتی عێراق (سۆمۆ) عەلی نزار."
ئەوەشی خستەڕوو: "هەردوولا کۆبوونەوەیەکیان ئەنجامدا کە تێیدا تاوتوێی ئاسۆکانی هاوکاریی هاوبەشی نێوان هەردوو وڵات لە بواری وزەدا کرا."
