بەغدا – INA– محەمەد تاڵبی
ئەنجومەنی ڕاژەی فیدراڵی، ئەمڕۆ پێنجشەممە، ڕایگەیاند کە پێشنیازێک بۆ دامەزراندنی "بانکێکی سەروەریی وەزیفی" تایبەت بە فەرمانبەران و داواکارانی دامەزراندن ئامادە کراوە، هاوکات ڕاستی تەرخانکردنی ٢٠ هەزار پلەی وەزیفیشی ڕوون کردەوە.
فازڵ غەراوی، گوتەبێژی فەرمی ئەنجومەنی ڕاژە بە ئاژانسی هەواڵی عێراقی (INA)ی ڕایگەیاند: "ئەو دەنگۆیانەی لەبارەی تەرخانکردنی ٢٠ هەزار پلەی وەزیفی بڵاوبوونەتەوە، پەیوەستە بە پێشنیازێکی موحی مورتەزا قەزوینی، سەرۆکی ئەنجومەنی ڕاژەی فیدراڵی کە ئاڕاستەی حکومەتی کردووە، بۆ ئەوەی ٢٠ هەزار پلەی وەزیفی بۆ دەرچووانی ساڵانی ڕابردوو تەرخان بکرێت."
ئاماژەی بەوەش کرد کە ئەم پێشنیازە ئێستا لە لایەن حکومەتەوە لە قۆناغی لێکۆڵینەوەدایە. غەراوی جەختی کردەوە کە: "تاوەکو ئێستا هیچ پلەیەکی وەزیفی بۆ دامەزراندن ڕانەگەیەندراوە و ئەنجومەنەکە چاوەڕێی بڕیارەکانی ناو یاسای بودجە و تەرخانکردنی دارایی و دیاریکردنی میلاکی وەزارەتەکان دەکات."
گوتەبێژی ئەنجومەنی ڕاژە ڕوونیشی کردەوە کە گەورەترین ئاستەنگ لەبەردەم پرۆسەی دامەزراندندا، پەسەندنەکردنی یاسای بودجە و نەبوونی پلەی وەزیفی و تەرخانکردنی دارایی پێویستە.
سەبارەت بە پڕۆژە نوێیەکەیان، غەراوی ئاشکرای کرد: "ئەنجومەنی ڕاژە خەریکی لێکۆڵینەوەیە لە پێشنیازی دامەزراندنی (بانکی سەروەریی وەزیفی)، کە ئامانج لێی دروستکردنی بنکەیەکی زانیاریی گشتگیر و وردە بۆ تەواوی فەرمانبەرانی دەوڵەت و ئەو کەسانەی بەدوای دامەزراندندا دەگەڕێن."
لە کۆتاییدا، داوای لە هاووڵاتییان و دەرچووان کرد کە تەنها پشت بە ماڵپەڕ و سەرچاوە فەرمییەکانی ئەنجومەنی ڕاژە ببەستن بۆ وەرگرتنی هەر هەواڵێکی تایبەت بە دامەزراندن و بڕوا بە هیچ سەرچاوەیەکی دیکە نەکەن.
