نەجەفی ئەشرەف- INA
سەید موقتەدا سەدر، ڕێبەری ڕەوتی نیشتمانیی شیعە، ئەمڕۆ پێنجشەممە داوای پشتگیریکردنی هەڵمەتی نوێی چاکسازی کرد و بانگەوازی کرد بۆ ئەنجامدانی "گردبوونەوەیەکی ئاشتییانە" بە مەبەستی پشتگیریکردن لەو پڕۆژە چاکسازییەی کە عەلی فالح زەیدی، سەرۆک وەزیران پەیڕەوی دەکات.
سەید سەدر لە وتارێکدا بۆ پشتیوانیکردنی هەڵمەتی چاکسازییەکانی سەرۆک وەزیران، کە لەلایەن شێخ حوسێن محمەداوی، ئیمام و خەتیبی نوێژی هەینی لە بەغدا خوێندرایەوە و ئاژانسی هەواڵی عێراقی (INA) بەدواداچوونی بۆ کردووە، ڕایگەیاند: "ئێمە هەمیشە داواکاری چاکسازی بووین و دەمێنینەوە، تەنانەت خۆشەویستیی ئیمام حوسێن (سەلامی خوای لێبێت) لەگەڵ گەندەڵکاران کۆمان ناکاتەوە. ئێوەش هەمیشە لە خۆشی و ناخۆشیدا لەگەڵم بوون، بۆیە با لەسەر ڕێگاکەمان بەردەوام بین بۆ پشتیوانیکردنی چاکسازی و ئەو هەڵمەتە نوێیەی کە تیشکەکەی لە ناو عێراقی خۆشەویستماندا دەستی بە درەوشانەوە کردووە."
هەروەها وتیشی: "بۆ گردبوونەوەیەکی ئاشتییانە ڕاپەڕن کە پشتیوانی لە چاکسازی و 'سەربازی چاکسازی' (برا زەیدی) بکات -خوای گەورە بیپارێزێت- تاوەکو ورەی ئەو بەهێز بکەین و ورەی گەندەڵکاران بڕووخێنین؛ ئەو گەندەڵکارانەی هەوڵ دەدەن گوشاری بخەنە سەر و لەو هەڵمەتە بوێرانە و بەرهەمدارانەی گرتن و پشکنین پاشگەزی بکەنەوە، کە ترسی خستووەتە دڵی زۆر کەس لە ناوخۆ و دەرەوەدا."
سەید سەدر لە درێژەی وتارەکەیدا وتی: "سوپاسی هەموو ئەوانە دەکەین کە هاوکاریی برای بەڕێز زەیدی-یان کردووە، وەک دادوەریی عێراق، سەرۆکی پەرلەمانی عێراق و هێزە ئەمنییە قارەمانەکان. هاوکات گەندەڵکاران بە بەرپرسیاری تەواو دەزانم بەرامبەر پاراستنی ژیانی چاکسازیخوازان و 'سەربازی چاکسازی' و هەموو ئەو کەسانەی کە دەیانەوێت شکۆ بۆ نیشتمان و ئایین و مەزهەب بگێڕنەوە.
