بەغداد - INA
سەرۆکی ئەنجومەنی وەزیران عەلی فالح زەیدی، ئەمڕۆ چوارشەممە، جەختی لەسەر گرنگی پەیوەندییە ئابووری و وەبەرهێنانەکانی نێوان عێراق و تورکیا کردەوە، و ئاماژەی بە بوونی زۆری ئەو دەرفەتە وەبەرهێنانانە کرد کە لەبەردەم کۆمپانیا تورکییەکاندا بەردەستن.
نووسینگەی ڕاگەیاندنی سەرۆکی ئەنجومەنی وەزیران، لە بەیاننامەیەکدا کە بۆ ئاژانسی هەواڵی عێراقی ناردووە، ڕایگەیاند: "سەرۆکی ئەنجومەنی وەزیران عەلی فالح زەیدی، پێشوازی کرد لە باڵیۆزی تورکیا لە عێراق ئەنیل بۆرا ئینان، و نوێنەرانی ژمارەیەک لە کۆمپانیا و پیاوانی کار و بازرگانانی تورکیا لە چوارچێوەی ئەنجومەنی کاری عێراقی-تورکیدا."
بەپێی بەیاننامەکە، زەیدی جەختی لەسەر "گرنگی پەیوەندییە ئابووری و وەبەرهێنانەکانی نێوان عێراق و تورکیا کردەوە، و ئاماژەی بە بوونی زۆری ئەو دەرفەتە وەبەرهێنانانە کرد کە لەبەردەم کۆمپانیا تورکییەکاندا بەردەستن، هەروەها ئاماژەی بە پڕۆژەی ڕێگای گەشەپێدان، پڕۆژەی بەندەری فاو، بەڕێوەبردن و کارپێکردنی نەخۆشخانە و فرۆکەخانەکان، و پڕۆژە وەبەرهێنانەکانی دیکە کرد، لەپاڵ پڕۆژەکانی وزە و بەڕێوەبردنی ئاودا."
بەیاننامەکە دەڵێت: "سەرۆکی ئەنجومەنی وەزیران ڕێنماییدا بە ئاسانکردنی ڕێکارەکانی تایبەت بە ڤیزای چوونەژوورەوە بۆ پیاوانی کاری تورکیا، لەگەڵ پێشکەشکردنی ئاسانکارییەکانی دیکە کە ببنە هۆی بەردەوامبوونی گوڕوتینی جووڵەی وەبەرهێنان لە عێراقدا."
لەلایەن خۆیەوە، باڵیۆزی تورکیا جەختی لەسەر "بایەخدانی حکومەتی وڵاتەکەی کردەوە بۆ پەرەپێدانی پەیوەندییە دوو قۆڵییەکانی نێوان هەردوو وڵاتی دۆست لە بوارە جیاجیاکاندا، لە کاتێکدا پیاوانی کاری تورکیا ئامادەیی خۆیان نیشاندا بۆ دەستپێکردنی پڕۆژە وەبەرهێنانەکان لە عێراقدا."
