بەغداد - INA
ڕاهێنەری هەڵبژاردەی نیشتمانی، گراهام ئارنۆڵد،جەختی کردەوە لەسەر هەوڵی هەڵبژاردەکە بۆ سەرکەوتن بەسەر سەنیگال و سەرکەوتن بۆ قۆناغی داهاتووی پاڵەوانێتی جامی جیهانی.
ئارنۆڵد لە کۆنگرەیەکی ڕۆژنامەوانیدا کە ئاژانسی هەواڵی عێراقی (INA) بەدواداچوونی بۆ کردووە، ڕایگەیاند: "هەڵبژاردەی عێراق سبەینێ ڕووبەڕووی هەڵبژاردەی سەنیگالی پاڵەوانی ئەفریقا دەبێتەوە، ئەمەش ئەزموونێکی ناوازەیە لە بەردەم یەکێک لە دیارترین هەڵبژاردەکان؛ ئێمە هیچ شتێکمان نییە لەدەستی بدەین، بەڵکو هەوڵ بۆ بەدیهێنانی سەرکەوتن دەدەین."
ئاماژەی بەوەش کرد کە لە ماوەی کارکردنیدا لەگەڵ هەڵبژاردەکە، دیسپلینێکی زۆری لە یاریزانەکاندا بەدی کردووە و گوتی: "لە ماوەی هەشت مانگی کارکردنم لەگەڵ هەڵبژاردەی عێراق، جگە لە دیسپلین و ورەی بەرز، چ لە ناوەوە و چ لە دەرەوەی یاریگا، هیچ شتێکی دیکەم نەبینیوە."
ئارنۆڵد لە درێژەی قسەکانیدا وتی: "هەردوو یارییەکەی بەردەم نەرویج و فەرەنسا هەندێک هەڵەیان بەخۆوە بینی، بەڵام ئەوانە وانەی گرنگن کە دەبێت لێیانەوە فێر ببین،" ڕوونیشی کردەوە کە "هەڵبژاردەکە لە ساتەوەختێکی مێژووییدا دەژی دوای سەرکەوتنی بۆ جامی جیهانی بۆ یەکەمجار لە دوای ٤٠ ساڵ."
هەروەها وتی: "ئەمڕۆ باشترین یەکەی مەشق و ڕاهێنانمان ئەنجامدا، یاریزانەکان پەرۆشییەکی گەورە و ورەیەکی بەرزیان هەیە بۆ بەدەستهێنانی سەرکەوتن لە بەردەم سەنیگال."
سەبارەت بە گرێبەستەکەشی، ئارنۆڵد وتی: "گرێبەستەکەم لەگەڵ هەڵبژاردەی عێراق دوای شەش هەفتەی دیکە کۆتایی دێت، لەگەڵ یونس مەحموود، سەرۆکی یەکێتیی تۆپی پێی عێراق قسەم کردووە و ڕێککەوتووین لەسەر ئەوەی دوای کۆتاییهاتنی پاڵەوانێتی جامی جیهانی تاوتوێی ئەم بابەتە بکەین."
