نێودەوڵەتی – INA
ئیدارەی دۆناڵد ترەمپ، سەرۆکی ئەمریکا، داوای لە کۆنگرێس کرد زیاتر لە ١.٤ ملیار دۆلار وەک بوودجەی زیادە تەرخان بکات بۆ ڕووبەڕووبوونەوەی پەرەسەندنی بڵاوبوونەوەی ڤایرۆسی ئیبۆلا، ئەم هەنگاوەش ڕەنگدانەوەی ئەو نیگەرانییە گەشەسەندووەیە لە فراوانبوونی مەودای قەیرانە تەندروستییەکە لە ئەفریقا و ئەگەری گواستنەوەی بۆ وڵاتانی دیکە.
بەوتەی بەرپرسێک لە ئیدارەی ترەمپ، داواکارییەکە نزیکەی ٨٠٠ ملیۆن دۆلار بۆ وەڵامدانەوەی مرۆیی بۆ قەیرانەکە لەخۆدەگرێت، کە پێکدێت لە دروستکردنی سەنتەرێکی کەرەنتینەکردنی تەندروستی لە کینیا بۆ ئەو ئەمریکیانەی کە بەر ڤایرۆسەکە کەوتوون، دابینکردنی پێداویستی پزیشکی و چارەسەر، بەدواداچوونی سەرچاوەی بەرکەوتنەکان، و بەهێزکردنی تۆڕەکانی پشتیوانی لۆجیستی ناوچەیی و ڕێکارەکانی بەرەنگاربوونەوەی گواستنەوەی نەخۆشییەکە.
هەروەها ئیدارەکە هەوڵدەدات ٥٠٠ ملیۆن دۆلاری دیکە بەدەستبهێنێت بۆ بەهێزکردنی ئاسایشی تەندروستی جیهانی، بە ئامانجی سنووردارکردنی بڵاوبوونەوەی ڤایرۆسەکە و ڕێگریکردن لە گەیشتنی بە ویلایەتە یەکگرتووەکان. بەپێی ڕاپۆرتێکی ڕۆژنامەی "نیویۆرک پۆست"ی ئەمریکی، ئەم تەرخانکردنانە پشتگیریکردنی سیستمەکانی چاودێریکردنی نەخۆشییەکان، فراوانکردنی تواناکانی تاقیگە، باشترکردنی هەماهەنگی نێوان سنوورەکان، و بەستنی هاوبەشی ئەگەری لەگەڵ ڕێکخراوە نێودەوڵەتییەکان و کەرتی تایبەت لەخۆدەگرێت.
هاوکات داواکارییەکە ٩٠ ملیۆن دۆلاریش بۆ هەوڵە دیپلۆماسییەکان لەخۆدەگرێت، لەنێویاندا پرۆسەکانی گواستنەوە و هێنانەوەی ئەو هاووڵاتییە ئەمریکیانەی کە تووشبوون بۆ سەنتەرەکانی چارەسەری گونجاو.
بەڵام ئەگەر هەیە ئەم داواکارییە لە ناو کۆنگرێسدا ڕووبەڕووی کۆسپ ببێتەوە، بەوپێیەی ژمارەیەک لە یاسادانەران، کە هەندێک لە کۆمارییەکانیشیان تێدایە، ناڕەزایەتییان دەربڕیوە بەرامبەر بە ڕەتکردنەوەی ئیدارەکە بۆ خەرجکردنی ئەو پارانەی کە پێشتر بۆ هاوکارییە دەرەکییەکان و چاودێری تەندروستی نێودەوڵەتی تەرخانکرابوون.
