بەغدا - INA
دەستەی ڕاگەیاندن و پەیوەندییەکان، ئەمڕۆ پێنجشەممە، تەواوبوونی پلانی تەکنیکی و ڕێکخستنی خۆی بۆ یادی عاشورا ڕاگەیاند، و جەختی کردەوە کە کارە مەیدانییەکان لە ڕێگەی ٦٣ تیم و ئەنجامدانی زیاتر لە ٥،٥٠٠ پشکنینی مەیدانییەوە بەڕێوەدەچن بۆ دڵنیابوون لە کوالێتیی خزمەتگوزارییەکانی پەیوەندی.
دەستەکە لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە، ڕایگەیاند: "پلانی تەکنیکی و ڕێکخستنی تایبەت بە بەدواداچوونی خزمەتگوزارییەکانی پەیوەندی لە میانی مەراسیمەکانی یادی ١٠ی موحەڕەم لە پارێزگای کەربەلای پیرۆز و شارەکانی دیکەی عێراق تەواو بووە، ئەوەش بە هاوئاهەنگی لەگەڵ کۆمپانیاکانی مۆبایل، بۆ دەستەبەرکردنی جێگیریی خزمەتگوزارییەکان و جێکردنەوەی ئەو زیادبوونە گەورەیەی لە قەبارەی بەکارهێناندا لە کاتی سەردانەکەدا ڕوودەدات."
ڕوونیشیکردەوە کە "کارەکانی بەدواداچوونی مەیدانی لە ڕێگەی (٦٣) تیمی سەر بە کۆمپانیاکانی مۆبایل و ژوورە ئۆپەراسیۆنە هاوبەشەکان لە سەرجەم پارێزگاکانی عێراق ئەنجام دەدرێن، بە جۆرێک ئەو تیمانە لە ماوەی ٨ ڕۆژدا (٥,٥٤٨) پشکنینی مەیدانییان ئەنجامداوە، بە ئامانجی دڵنیابوون لە بەردەوامیی خزمەتگوزارییەکان و چارەسەرکردنی هەر گرفتێک بە شێوەیەکی دەستبەجێ."
دەستەکە ئاماژەی بەوەش کرد: "کۆمپانیاکانی مۆبایل ژێرخانی پەیوەندییەکانیان لەو شارانەی پێشوازی لە سەردانیکەران دەکەن بەهێزتر کردووە، ئەوەش لە ڕێگەی جێگیرکردنی (٨١) وێستگەی گەڕۆک، کە (١٤)یان لە پارێزگای کەربەلای پیرۆزن، هەروەها زیادکردنی (٣٠٨) بورجی جێگیر کە (٨٠)یان لە ناو شاری کەربەلادان، جگە لە کارپێکردنی (٨٩) خانەی زیرەک و (٧٠١٤) خانەی هەمیشەیی کە زیاتر لە نیوەیان بەفریکوێنسی نائاسایی کاردەکەن بۆ بەرزکردنەوەی توانای تۆڕەکە و باشترکردنی کوالێتی خزمەتگوزارییەکان."
لە کۆتاییدا جەختی کردەوە کە "ژووری ئۆپەراسیۆنە هاوبەشەکان بەدرێژایی ٢٤ کاتژمێر بەردەوامە لە چاودێریکردنی ئاستی تۆڕەکان و هاوئاهەنگیی ڕاستەوخۆ لەگەڵ کۆمپانیاکانی مۆبایل بۆ چارەسەرکردنی هەر بارودۆخێکی لەناکاو، بە جۆرێک کە خزمەتگوزارییەکی پەیوەندیی جێگیر و ئارام بۆ هاووڵاتیان و سەردانیکەران لە میانی یادی عاشورادا دابین بکرێت.
