بەغدا - INA
ئەمڕۆ دووشەممە، بانکی ناوەندیی عێراق، تەواوبوونی ڕێکار و پێداویستییەکانی تایبەت بە تێکەڵکردنەوەی چەند بانکێکی ڕاگەیاند کە مامەڵەکردنیان بە دۆلاری ئەمریکی لە پرۆسەکانی حەواڵەی دەرەکی بە دراوە بیانییەکان لێ قەدەغەکرابوو (کۆتوبەند کرابوو).
بانکی ناوەندی لە ڕاگەیەندراوێکدا کە دەستی ئاژانسی هەواڵی عێراقی (INA) کەوتووە، ڕایگەیاند: "لە چوارچێوەی هەوڵەکانی بانکی ناوەندیی عێراق بۆ بەهێزکردنی سەقامگیریی نەختی و دارایی، پەرەپێدانی کەرتی بانکی، و بەرزکردنەوەی ئاستی تێکەڵبوونی لەگەڵ سیستمی دارایی جیهانیدا، بانکەکە بەردەوامە لە جێبەجێکردنی بەرنامە چاکسازییەکەی بە هەماهەنگی لەگەڵ دامەزراوە نێودەوڵەتییە پەیوەندیدارەکاندا، بە تیشکخستنە سەر چەند تەوەرێکی بنەڕەتی".
ڕاگەیەندراوەکە ئاماژەی بەوەش کردووە: "بانکی ناوەندیی عێراق ڕێکار و پێداویستییەکانی تایبەت بە تێکەڵکردنەوەی چەند بانکێکی تەواو کردووە کە پێشتر مامەڵەکردنیان بە دۆلاری ئەمریکی لە پرۆسەکانی حەواڵەی دەرەکی بە دراوە بیانییەکان لێ قەدەغەکرابوو، ئەمەش دوای ئەوەی بانکەکان پێداویستییەکانی پلانی چاکسازی و پێوەرە چاودێری و هۆنەرییە پەیوەندیدارەکانیان جێبەجێ کرد، و چوارچێوەکانی خۆیان لە بواری بەرەنگاربوونەوەی سپیکردنەوەی پارە و دارایی تێرۆریزدا بەهێز کرد"، ڕوونیشی کردەوە کە "ئەم مەلەفە گەیشتووەتە قۆناغەکانی کۆتایی وەک ئامادەکارییەک بۆ تێکەڵکردنەوەیان بە شێوازێکی پلەبەندی و ڕێکخراو، بە شێوەیەک کە توانای ئەم بانکانە بۆ خزمەتکردنی کڕیارەکانیان بەهێز بکات، و پەرەپێدانی پەیوەندییە کارگێڕییە دەرەکییەکانیان بەپێی باشترین پەیڕەو و پێوەرە نێودەوڵەتییەکان پاڵپشتی بکات".
ئاماژەی بەوەشکرد کە: "بانکی ناوەندی پێداویستییە هۆنەری و ڕێکارییەکانی پێویستی بۆ بەرزکردنەوەی سەقفی کارتەکانی پارەدانی ئەلیکترۆنیی تایبەت بە چینی کۆمپانیا تۆمارکراوەکان و کارە بازرگانییەکان تەواو کردووە، ئەمەش بەشدار دەبێت لە فراوانکردنی مەودای خزمەتگوزارییە داراییە دیجیتاڵییەکان، بەهێزکردنی گشتگیریی دارایی، و دابینکردنی پێداویستییەکانی چینە جیاوازەکانی بەکارهێنەرانی ئامرازەکانی پارەدان، بەوپێیەی بانکەکە بە شێوازێکی پلەبەندی و لێکۆڵدراوەوە بەرەو جێبەجێکردنی قۆناغەکانی داهاتووی ئەم پڕۆژەیە هەنگاو دەنێت، بە شێوەیەک کە گەرەنتیی چەسپاندنی ڕێسا چاودێرییەکان بکات بۆ بەهێزکردنی پاکی و کارایی سیستمی دارایی و هاوتەریببوون لەگەڵ گەشەسەندنە خێراکان لە کەرتی داراییدا".
بەپێی ڕاگەیەندراوەکە، بانکی ناوەندیی عێراق پەرۆشیی خۆی دووپات کردووەتەوە بۆ "دابینکردنی داواکاری لەسەر دۆلاری ئەمریکی بەپێی ڕێسا و پێوەرە پەسەندکراوەکان، بە شێوەیەک کە گەرەنتیی ئاسانکاریی حەواڵەکان و دابینکردنی پێداویستییە ڕەواکانی هەردوو کەرتی گشتی و تایبەت بکات، ئەمەش بە پشتبەستن بە یەدەگێکی بەهێزی بیانی و ئامرازی نەختیی کارا، کە هاوتەریبە لەگەڵ پابەندبوونی تەواو بە پێداویستییەکانی گونجاندن و پێوەرەکانی بەرەنگاربوونەوەی سپیکردنەوەی پارە و دارایی تێرۆریز، و سیاسەتێکی نەختی کە بنەمای لەسەر سەقامگیریی نرخی ئاڵوگۆڕ و سەلامەتیی کەناڵە داراییەکانە".
بانکەکە جەختیشی کردووەتەوە کە "ئەم ڕێکارانە بەشێکن لە بەرنامەیەکی چاکسازیی گشتگیر کە ئامانجی چارەسەرکردنی تەحەددییە تێپەڕیوەکان و یەکلاییکردنەوەی مەلەفە ئەولەوییەتدارەکانە، بە شێوەیەک کە متمانە بە کەرتی بانکیی عێراقی بچەسپێنێت، و بنەماکانی سەقامگیریی دارایی و نەختی پاڵپشتی بکات، و پشتگیری لە کاروانی گەشەپێدانی ئابووری لە وڵاتدا بکات".
لە کۆتاییدا هاتووە کە بانکی ناوەندی "بەردەوام دەبێت لە گرتنەبەری ڕێکار و سیاسەتە پێویستەکان بۆ پەرەپێدانی ژینگەی بانکی، بەرزکردنەوەی کارایی سیستمی دارایی، و دابینکردنی پێکهاتە پاڵپشتەکان بۆ گەشەی ئابووریی بەردەوام، بە شێوەیەک کە سەقامگیریی دارایی لەسەر مەودای دوور بەدی بهێنێت و پارێزگاری لە سەقامگیریی نرخی ئاڵوگۆڕ و سەلامەتیی کەناڵە داراییەکان بکات".
