بەغدا - INA
هەڵبژاردەی نیشتمانیمان بۆ تۆپی پێ، لە کاتژمێر 12ی شەوی ئەمڕۆ دووشەممە، ڕووبەڕووی تاقیکردنەوەیەکی سەخت و یەکلاکەرەوە دەبێتەوە کاتێک لە گەڕی دووەمی ڕکابەرایەتییەکانی کۆمەڵەی نۆیەم لە پاڵەوانێتیی جامی جیهانیی 2026دا، بەرامبەر هاوتا فەڕەنسییەکەی یاری دەکات.
یارییەکە لەسەر یاریگای "Lincoln Financial Field" لە شاری فیلادلفیای ئەمریکا بەڕێوەدەچێت، و ژمارە (42)ی لە خشتەی یارییەکانی پاڵەوانێتییەکەدا هەیە، هاوکات ئەرکی ناوبژیوانیی یارییەکەش بەخشراوە بە ناوبژیوانی کەنەدی، درو فیشەر.
یارییەکە گرنگییەکی زۆری بۆ شێرەکانی ڕافیدەین هەیە دوای ئەوەی لە گەڕی یەکەمدا لە بەرامبەر نەرویج تووشی شکست بوون، ئەمەش وا دەکات بەدەستهێنانی ئەنجامێکی ئەرێنی بەرامبەر هەڵبژاردەی فەڕەنسا ببێتە کارێکی یەکجار گرنگ، بۆ پاراستنی هیوای مانەوەیان لە کێبڕکێی بەدەستهێنانی یەکێک لە بلیتەکانی سەرکەوتن بۆ قۆناغی داهاتوو.
لەلایەکی دیکەوە، هەڵبژاردەی فەڕەنسا بە ورەیەکی بەرزەوە دێتە ناو یارییەکەوە دوای سەرکەوتنی لە یاریی یەکەمیدا، و هەوڵ دەدات ژمارەی خاڵەکانی زیاد بکات و هەنگاوێکی دیکە لە یەکلاکردنەوەی پێشوەختەی سەرکەوتنی بۆ قۆناغەکانی کۆتایی نزیک ببێتەوە.
ئەم ڕووبەڕووبوونەوەیە گرنگییەکی مێژووییشی هەیە، چونکە ئەمە یەکەمجارە هەردوو هەڵبژاردەی عێراق و فەڕەنسا لە کۆتایییەکانی جامی جیهانیدا کۆببنەوە، ئەمەش لە پاڵ بەها گەورە ڕکابەرایەتییەکەیدا، کەشێکی تایبەتی پێ دەبەخشێت.
لەسەر ئاستی تەکنیکی، هەڵبژاردەی نیشتمانیمان چاوی بڕیوەتە پێشکەشکردنی ئەدایەکی هاوسەنگ کە لە نێوان دیسپلینی بەرگری و کارایی هێرشبەریدا کۆبکاتەوە، لە مواجەهەی یەکێک لە دیارترین ئەو هەڵبژاردانەی کە بەربژێرن بۆ کێبڕکێکردن لەسەر نازناوەکە. سنووردارکردنی مەترسییەکانی توخمە هێرشبەرەکانی فەڕەنسا، کە لە پێشەنگیاندا کیلیان ئێمباپێ و مایکڵ ئۆلیس دێن، لە دیارترین ئەو تەحەدایانە دەبن کە ڕووبەڕووی ستافی تەکنیکیی عێراق دەبنەوە.
جەماوەری عێراق بە ئاواتێکی گەورەوە چاوەڕوانی ئەم ڕووبەڕووبوونەوەیە دەکەن، بەو هیوایەی شێرەکانی ڕافیدەین بتوانن ئەدایەک پێشکەش بکەن کە شایستەی ئامادەبوونی جیهانییان بێت و ئەنجامێک بەدەست بهێنن کە بیانگەڕێنێتەوە ناو بازنەی کێبڕکێی کۆمەڵەکە.
