بەغدا - INA
ئەمڕۆ هەینی، دەستەی دەسپاکی فیدراڵی، دەستگیرکردنی 6 تۆمەتباری بە تۆمەتی دەستکاریکردن و ساختەکاری بۆ گواستنەوەی خاوەندارێتی خانوووبەرەیەک لە بەسڕە ڕاگەیاند.
دەستەکە لە ڕاگەیاندراوێکدا کە دەستی ئاژانسی هەواڵی عێراقی (INA) کەوتووە، ئاماژەی بەوە کردووە: "دەستەکە دوو پرۆسەی دەستبەسەرداگرتنی لە پارێزگای بەسڕە جێبەجێ کردووە، کە تێیدا (6) تۆمەتبار دەستگیرکراون؛ بەهۆی تێوەگلانیان لە کەیسی دەستکاریکردن و ساختەکاری بە مەبەستی گواستنەوەی خاوەندارێتی خانوووبەرەیەکی سەر بە هاووڵاتییەک، و ڕاییکردنی مامەڵەکان بە شێوازێکی پێچەوانەی یاسا".
دەستەکە ئاماژەی بەوەش کردووە: "تیمێکی کار لە بەشی لێکۆڵینەوە و دەستبەسەرداگرتن لە بەڕێوەبەرایەتیی لێکۆڵینەوەی بەسڕە پێکهێنرا، کە چوونە بەڕێوەبەرایەتیی دووەمی تۆمارکردنی خانوووبەرە (تاپۆ)، و توانییان (4) تۆمەتبار دەستگیر بکەن کە بەڵگەنامەی سەرەتایی و بریکارنامەیەکیان (وەکالە) پێبووە کە لەلایەن دادنووسی مەدائینەوە دەرچووە؛ ئەمەش بە مەبەستی بەڕێوەبردنی ڕێکارەکانی گواستنەوەی خاوەندارێتی خانوووبەرەیەک کە هی هاووڵاتییەکە، و قۆستنەوەی بێتوانایی خاوەنی خانوووبەرەکە بۆ سەردانیکردن؛ چونکە لە ساڵی 2020وە بەهۆی نەخۆشییەوە کەنەفت و پەککەوتە بووە".
ئاماژەی بەوەشکرد: "دوای ڕوونکردنەوە و پرسیارکردن لە تۆمەتباران لەسەر ناوی خاوەنی خانوووبەرەکە، ئیدیعای ئەوەیان کرد کە لە پارێزگای هەولێر نیشتەجێیە و بریکارنامەیەکی گشتی پێداون"، لای خۆشییەوە ئاماژەی بەوە کرد کە "دوای ئەوەی تیمەکە وردبینی لە بەڵگەنامە سەرەتاییەکاندا کرد، دەرکەوت کە ڕاست نین و پێچەوانەی یاسان، بەو پێیەی نرخی خەمڵێنراوی خانوووبەرەکە کە دەکەوێتە چەقی پارێزگاکەوە، دەگاتە (250,000,000) دینار".
دەستەکە ڕوونی کردەوە: "لە پرۆسەی دووەمدا، بەڕێوەبەرایەتییەکە (8) تیمی مەیدانی پێکهێنا کە چوونە ناو فەرمانگە خزمەتگوزارییەکانی پارێزگاکە؛ بە مەبەستی دۆزینەوە و چاودێریکردنی سەرپێچییە کارگێڕی و داراییەکان"، ئاماژەی بەوەش کرد کە "ئەو تیمەی چووە بەڕێوەبەرایەتیی باجی بەسڕە، دوو تۆمەتباری دەستگیرکرد کە کۆمەڵێک مامەڵەی هاووڵاتییانیان پێبووە بە مەبەستی ڕاییکردنیان وەک معقیب".
ئەوەشی خستەڕوو: "دوای وردبینیکردنی مامەڵەکان، دەرکەوت کە هیچ بریکارنامەیەکی فەرمی یان بەڵگەنامەیەکی یاسایی بوونی نییە کە ڕێگەیان پێبدات ئەو کارە بکەن، هەروەها دەست بەسەر کۆمەڵێک مامەڵەی باجدا گیرا کە لەلای ئەوان بووە و واژۆ و مۆری فەرمانگەکەی پێوە بووە"، ئاماژەی بەوەش کرد کە "دادوەری دادگای لێکۆڵینەوەی دەسپاکی و سپیکردنەوەی پارە لە بەسڕە، بڕیاری ڕاگرتنی هەر (6) تۆمەتبارەکەی دا کە لە هەردوو پرۆسەکەدا دەستگیرکرابوون، لەپێناو تەواوکردنی لێکۆڵینەوەکان".
