بەغدا - INA
عەدنان فەیحان، جێگری یەکەمی سەرۆکی ئەنجوومەنی نوێنەران و عەبدولڕەحیم شەممەری، وەزیری کشتوکاڵ، ئەمڕۆ چوارشەممە ڕێگاکانی بەهێزکردنی ئاسایشی خۆراک و پاراستنی بەرهەمی نیشتمانییان تاوتوێ کرد.
نووسینگەی ڕاگەیاندنی جێگری یەکەمی سەرۆکی ئەنجوومەنی نوێنەران لە ڕاگەیەندراوێکدا کە بۆ ئاژانسی هەواڵی عێراقی (INA) نێردراوە ڕایگەیاند: عەدنان فەیحان، جێگری یەکەمی سەرۆکی ئەنجوومەنی نوێنەران، پێشوازی لە عەبدولڕەحیم شەممەری، وەزیری کشتوکاڵ کرد، بە مەبەستی تاوتوێکردنی بارودۆخی کەرتی کشتوکاڵ و ئاسۆکانی پەرەپێدانی، و ڕێگاکانی بەهێزکردنی ئاسایشی خۆراک و پاڵپشتیکردنی بەرهەمی نیشتمانی.
ئاماژەی بەوەش کرد کە لە دیدارەکەدا باس لەو یاسا و بڕیارانە کرا کە دەبنە هۆی پاڵپشتیکردنی کەرتی کشتوکاڵ، بە شێوەیەک کە یارمەتیدەر بێت لە بەدیهێنانی گەشەپێدانی بەردەوام و بەهێزکردنی سەقامگیری ئابووری.
بەپێی ڕاگەیەندراوەکە، فەیحان جەختی کردەوە لەسەر گرنگی پەرەپێدانی پلانە کشتوکاڵییەکان بۆ ڕووبەڕووبوونەوەی ئەو ئاڵنگارییانەی دێنە ڕێی ئەم کەرتە زیندووە، کە لە پێش هەموویانەوە بیابانبوون و کەمیی سەرچاوەکانی ئاو و گۆڕانکارییەکانی کەشوهەوان، لەگەڵ پاڵپشتیکردنی بەرنامەکانی چاکسازی کشتوکاڵی و زیادکردنی بەرهەمی ناوخۆیی. هەروەها جەختیشی کردەوە لەسەر پێویستی جێبەجێکردنی ئەوەی لە کارنامەی حکومەت و ڕاسپاردەکانی ئەنجوومەنی نوێنەراندا هاتووە سەبارەت بە پاراستنی بەرهەمی نیشتمانی و پاڵپشتیکردنی جوتیاران، بە مەبەستی بەهێزکردنی بنەماکانی گەشەپێدانی کشتوکاڵی لە وڵاتدا.
لای خۆشیەوە، وەزیری کشتوکاڵ ستایشی گرنگیدان و پاڵپشتییەکانی جێگری یەکەمی سەرۆکی ئەنجوومەنی نوێنەرانی کرد بۆ دۆسیە ستراتیژییەکانی کشتوکاڵ، و جەختی کردەوە لەسەر گرنگی بەردەوامبوونی هەماهەنگی نێوان هەردوو دەسەڵاتی تەشریعی و جێبەجێکردن بۆ تێپەڕاندنی ئاڵنگارییەکان و بەدیهێنانی ئامانجەکانی ئاسایشی خۆراک و پاراستنی بەرهەمی نیشتمانی.
