بەغداد- INA - ئامنە سەلامی
وەزارەتی ئاوەدانکردنەوە و نیشتەجێکردن و شارەوانییە گشتییەکان، ئەمڕۆ سێشەممە ڕایگەیاند کە زیاتر لە 200 پڕۆژە لە چوارچێوەی ئەولەوییەتەکانی وەزارەتدا بۆ ژێرخان لە قۆناغی جێبەجێکردندان، لە هەمان کاتدا ئاماژەی بەوە کرد کە پڕۆژەی نوێ هەن چاوەڕێی تەرخانکردنی دارایی دەکەن دوای پەسەندکردنی بوودجە.
نەبیل سەفار، وتەبێژی وەزارەتەکە بە ئاژانسی هەواڵی عێراقی (INA)ی ڕاگەیاند: "وەزارەت لە ڕێگەی بەڕێوەبەرایەتی گشتی پلاندانانی تەمەنومانی (ئاوەدانی) کە یەکێکە لە پێکهاتەکانی وەزارەتی ئاوەدانکردنەوە و نیشتەجێکردن و شارەوانی و کارە گشتییەکان و بەپێی بڕیاری ئەنجومەنی سەرکردایەتی شۆڕشی (هەڵوەشاوە) ژمارە (13)ی ساڵی 1984 دامەزراوە، هەوڵدەدات بەرنامەی گشتی و گشتگیر دابڕێژێت کە تایبەتن بە گەشەپێدانی ئاوەدانیی شوێنی و هەموو ئەو بابەتانەی پەیوەستن بە سیاسەتی زەوی، پلاندانان، ڕێکخستن و چۆنیەتی بەکارهێنانی، لەنێوانیشیاندا ئەوانەی پەیوەستن بە ناوچەکانی گوند و دێهاتەکان، بۆ ئەوەی ببێتە سەرچاوەی کۆتایی (مەرجەع) بۆ سەرجەم ئەو چالاکییانەی پەیوەستن بە بەکارهێنانی زەوی و دیاریکردنی شوێنی پڕۆژەکانی گەشەپێدان و ئاوەدانکردنەوە".
وتیشی: "بەڕێوەبەرایەتی گشتی پلاندانانی تەمەنی، ئەرکەکانی پلاندانان جێبەجێ دەکات کە خۆیان لە پلانە پێکهاتەییەکان بۆ پارێزگاکان، نەخشە بنەڕەتییەکان (ماستەرپلان) بۆ شارەکان، پلانە ئاوەدانییە خۆجێییەکان و نەخشە وردەکاندا دەبیننەوە، ئەمەش بە هەماهەنگی لەگەڵ فەرمانگە لاوەکییەکان و ئامادەکردنی نەخشەی شارستانی بۆ سەنتەری ئەو شارانەی سروشتێکی تایبەتیان هەیە"، ئاماژەی بەوەش کرد کە "بەڕێوەبەرایەتییەکە ئەرکە تەکنیکییەکانی، کە پێکهاتوون لە سەرجەم ئاستەکانی پلاندانانی ئاوەدانی، لە ڕێگەی بەش و لقەکانی لە پارێزگاکاندا (بەڕێوەبەرایەتییەکانی پلاندانانی ئاوەدانی لە پارێزگاکان) جێبەجێ دەکات کە لە ڕووی تەکنیکییەوە پێوەی بەستراونەتەوە".
ڕوونیشیکردەوە کە "بەڕێوەبەرایەتییەکە 15 فەرمانگەی لاوەکی لە سەرجەم پارێزگاکاندا هەیە جگە لە پارێزگاکانی هەرێمی کوردستان، کە لە ڕووی تەکنیکییەوە بەستراونەتەوە بە بەڕێوەبەرایەتی گشتییەوە، جگە لە پارێزگای کەرکوک کە تا ئێستاش لە ڕووی تەکنیکی، کارگێڕی و داراییەوە بەستراوەتەوە بە بارەگای بەڕێوەبەرایەتی گشتی پلاندانانی ئاوەدانییەوە"، ئاماژەی بەوەش کرد کە "بەڕێوەبەرایەتییەکە کاردەکات لەسەر لێکۆڵینەوە بۆ گەشەپێدانی ناوچە زیان لێکەوتووەکان، پاراستنی ناوچە مێژوویی و کەلەپوورییەکان، پارێزراوە سروشتییەکان و نوێکردنەوەی شارستانی بۆ سەنتەری شارەکان، سەرەڕای لێکۆڵینەوە لە داواکارییەکانی گۆڕینی بەکارهێنانی زەوی لە چوارچێوەی نەخشە پەسەندکراوەکانی شارەکاندا، و هەروەها ئامادەکردن و نوێکردنەوەی پێوەرە یەکگرتووەکانی پلاندانان بۆ ئەژمارکردنی خزمەتگوزارییەکان لە ناوچە نیشتەجێبووەکانی شارەکاندا و دیاریکردنی مەرجەکانی جیاکردنەوەی زەوی لە سەر ئاستی گەڕەکی نیشتەجێبوون و بەرەو سەرەوە، دوای یەکخستنیان لەسەر ئاستی عێراق بۆ ئەوەی لەلایەن پارێزگاکانەوە پشتی پێ ببەسترێت".
سەبارەت بە پڕۆژە ڕاوەستاوەکانیش، سەفار جەختی کردەوە کە "ئەولەوییەتی ئێستای وەزارەت تەواوکردنی ئەو پڕۆژانەیە کە پێی سپێردراون و بەدواداچوون بۆ جێبەجێکردنیان، بەتایبەت ئەو پڕۆژانەی پەیوەستن بە خزمەتگوزارییەکانی ژێرخانەوە، ئەمەش بەپێی ئەو بڕە پارانەی کە پێشتر تەرخانکراون و خەرج دەکرێن"، لای خۆشیەوە ئاماژەی بەوە کرد کە "وەزارەت زیاتر لە 200 پڕۆژەی چالاکی لەبەر دەستدایە، و لە ناو پلانەکانی وەزارەتیشدا پڕۆژەی دیکە هەن کە چاوەڕێی هێنانەناوهوه و تەرخانکردنی پارەن بۆیان دوای پەسەندکردنی بوودجە".
