کەرکووک - INA - ڕوودی ئەنوەر
ئەمڕۆ دووشەممە، پارێزگای کەرکووک، دەستپێکردنی پلانی نوێی خۆی بۆ ڕێکخستن و پاراستنی هەردوو پرۆسەی دروێنەکردن و ساغکردنەوەی بەرهەمی گەنمی بۆ وەرزی داهاتوو ڕاگەیاند، ئەمەش بە هەماهەنگیی هاوبەش لەگەڵ دەزگا ئەمنییەکان و بەرگریی شارستانی بە مەبەستی ڕەواندنەوەی ئاستەنگەکانی بەردەم جووتیاران.
پارێزگاری کەرکووک و سەرۆکی لیژنەی دروێنە و ساغکردنەوە، محەمەد سەمعان ئاغا، لە کۆنگرەیەکی ڕۆژنامەوانیدا کە پەیامنێری ئاژانسی هەواڵی عێراقی (INA) ئامادەی بوو، ڕایگەیاند: "لە دوای کۆبوونەوەی دووەمی لیژنەکە کە ئەمڕۆ بەڕێوەچوو، بڕیاردرا بە ڕاسپاردنی یەکە سەربازی و هێزە ئەمنییەکان بۆ چاودێریکردنی ڕێگە لاوەکی و گوندنشینەکان، لە پاڵ بەشدارپێکردنی 30 مەفرەزەی بەرگریی شارستانی بۆ پاراستنی کێڵگەکانی گەنم لە ئاگرکەوتنەوە و دابینکردنی ئاسایشی تەواو بۆ بەرهەمەکان".
ئاغا ئاماژەی بەوەش کرد کە "پلانەکە کارپێکردنی بنکەکانی ساغکردنەوە و وەرگرتنی دانەوێڵە لەسەر جێگەی 24 کاتژمێری بەردەوام لەخۆدەگرێت بە مەبەستی هاوکاریکردنی جووتیاران و ئاسانکاریی پرۆسەکانی بەتاڵکرد، لە پاڵ ڕێکخستنی لیستی وردی ناوی جووتیاران و بڕە ساغکراوەکان و دیاریکردنی ژمارەی ئۆتۆمبێلە بارهەڵگرەکان و زانیارییەکانیان"، جەختیشی کردەوە کە "بڕیارەکان کەمکردنەوەی ژمارەی لیژنە پێکهێنراوەکانیشی گرتووەتەوە؛ بە ئامانجی نەهێشتنی ئاڵۆزییە ڕۆتینییەکان و خێراکردنی ڕەوتی کارەکان".
پارێزگار ڕوونی کردەوە کە "لیژنەکە یەکەم ڕۆژی حوزەیرانی داهاتووی (1/6/2026) وەک وادەی دەستپێکردنی فەرمیی وەرزی ساغکردنەوە لە کەرکووک دیاری کردووە"، نیشانیشی دا کە "ڕووبەری ئەو زەوییانەی کە لە ناو پلانی کشتوکاڵیی پارێزگاکەدان دەگاتە 420 هەزار دۆنم و پێشبینی دەکرێت بڕی بەرهەمەکەیان 450 هەزار تۆن تێپەڕێنێت، لە کاتێکدا ڕووبەری ئەو زەوییە دێمنانەی کە لە دەرەوەی پلانی کشتوکاڵیدا چێنراون دەگاتە 500 هەزار دۆنم".
