بەغدا- INA
ئەمڕۆ دووشەممە، دەستەی دەسپاکی فیدراڵی، ڕێگریکردنی لە بەفیڕۆدانی بڕی (7.5) ملیار دینار ڕاگەیاند، هاوکات 4 فەرمانبەری لە کارەبای فوراتی ناوەڕاست دەستگیرکرد.
لە ڕاگەیەندراوێکی دەستەکەدا کە دەستی ئاژانسی هەواڵی عێراقی (INA) کەوتووە، هاتووە: "نووسینگەی لێکۆڵینەوەی کەربەلای پیرۆز، تیمێکی کارکردنی هاوبەشی لەگەڵ سەندیکای ئەندازیارانی عێراق لە پارێزگاکە پێکهێنا، کە ئەندازیارانی پسپۆڕی لەخۆگرتبوو، تیمەکە چوونە کۆگایەکی سەر بە کۆمپانیای گشتی گواستنەوەی وزەی کارەبا لە فوراتی ناوەڕاست"، ئاماژەی بەوەش کردووە کە "تیمەکە ئاشکرایان کردووە کە کۆگاکە فەرمی و یاسایی نییە و کامێرای چاودێری لێ نییە، سەرەڕای هەبوونی کەرەستەی فڕێدراو لە دەرەوەی کۆگاکە لەسەر شەقامی گشتی کە ئەگەری دزین و لەناوچوونیان هەبووە".
ئاماژەی بەوەشکردووە: "تیمەکە کەرەستەکانی ناو کۆگاکەیان سەرژمێری کردووە کە پارێزگارییان لێکراوە، و بەهاکەیان دەگاتە (7,462,729,177) دینار"، ڕوونیشیکردووەتەوە کە "کۆمپانیای گشتی گواستنەوەی وزەی کارەبا لە فوراتی ناوەڕاست بەهاکەی دیاریکردووە".
هەروەها هاتووە: "(4) لە فەرمانبەرانی کۆمپانیاکە دەستگیرکران؛ بەهۆی ئەوەی بوونەتە هۆی زیانگەیاندن بە ماڵی گشتی"، ئاماژەی بەوەش کردووە "ئەو کەرەستانەی لە کۆگاکەدا بوون زیادەی پڕۆژەکان بوون کە کۆمپانیاکە بە جێبەجێکردنی ڕاستەوخۆ ئەنجامی دابوون، و تۆمەتباران هەوڵیانداوە سوودی لێ وەربگرن بۆ بەدەستهێنانی بەرژەوەندی کەسی".
ئاماژەی بەوەش کردووە: "کۆنووسێکی دەستبەسەرداگرتن ڕێکخرا و لەگەڵ تۆمەتبارە دەستگیرکراوەکان خرایە بەردەم دادوەری دادگای لێکۆڵینەوەی کەربەلا کە تایبەتە بە کەیسەکانی دەسپاکی، ئەویش بڕیاری ڕاگرتنیانی دا بەپێی حوکمەکانی ماددەی (331) لە یاسای سزادان".
