بەغدا – INA – ویسام مەلا
ئەمڕۆ دووشەممە ، وەزیری ڕۆشنبیری و گەشتوگوزار و شوێنەوار، ئەحمەد فەکاک بەدرانی، جەختی لە گرنگیی یەکخستنی گوتاری ڕۆشنبیری و ڕاگەیاندن لە کاتی تەنگژەکاندا کردەوە، هاوکات ئاماژەی بەوە کرد کە وادەی میوانداریکردنی وەزیرانی ڕۆشنبیریی وڵاتانی ئیسلامی لە عێراق هێشتا وەک خۆیەتی.
بەدرانی بە ئاژانسی هەواڵی عێراقی (INA)ی ڕاگەیاند: "یەکخستنی گوتاری ڕۆشنبیری و ڕاگەیاندن یەکێکە لە پێویستییە هەنووکەییەکان لە کاتی تەنگژەکاندا، بەهۆی هەستیاریی ئەم قۆناغەی کە پێویستی بە یەکخستنی دیدگا و هەڵوێستەکان هەیە،" ئاماژەی بەوەش کرد کە "یەکگرتوویی گوتارەکە یارمەتیدەر دەبێت لە ڕەواندنەوەی دابەشبوونەکان و نزیککردنەوەی دیدگای لایەنە جیاوازەکان، و تێڕوانین بۆ نیشتمان بە یەک چاو و بە ڕۆحی هاوڵاتیبوون بەهێزتر دەکات."
سەبارەت بە میوانداریکردنی وەزیرانی ڕۆشنبیریی وڵاتانی ئیسلامی، ئاماژەی بەوە کرد کە "وەزارەت بە هەماهەنگی لەگەڵ ڕێکخراوی ئیسیسکۆ (ICESCO) کار بۆ ڕێکخستنی ئەم میواندارییە دەکات،" جەختیشی کردەوە کە "وادە دیاریکراوەکان هێشتا جێگیرن، بەڵام لە کاتی ئێستاوە دوورن."
ئەوەشی ڕوون کردەوە کە "وەزارەتی ڕۆشنبیری هەوڵێکی زۆری داوە بۆ بوژاندنەوەی گەشتوگوزار لە عێراق، بەڵام بارودۆخی جەنگەکان بووە هۆی لەدەستچوونی هەندێک هەل."
