بەغداد - INA
ناوەندە سیاسییەکانی عێراق، ئەمڕۆ چوارشەممە، پێشوازییان لە ڕاگرتنی شەڕی نێوان ویلایەتە یەکگرتووەکانی ئەمریکا و کۆماری ئێران کرد.
لەو بارەیەوە، سەید عەممار حەکیم، سەرۆکی هاوپەیمانی هێزەکانی دەوڵەتی نیشتمانی لە بەیاننامەیەکدا ڕایگەیاند: "پێشوازی لە ڕاگرتنی شەڕی سەر کۆماری ئیسلامی ئێران دەکەم"، جەختیشی کردەوە لەسەر "پێویستی ڕێزگرتن لە سەروەری دەوڵەتان و پێشێلنەکردنیان".
داوای کرد "دانوستانە بڕیاردراوەکانی نێوان ئێران و ئەمریکا جدی و واقیعی بن"، هیوایشی خواست "ئەمانە هەمووی ببێتە هۆی ئاشتییەکی هەمیشەیی و سەقامگیر لە ناوچەکەدا و دەستەبەری دووبارەنەبوونەوەی ئەوە بکات کە ڕوویدا، و گەلانی ناوچەکە و لە نێویشیاندا عێراق لە نەهامەتییەکانی شەڕ و لێکەوتە وێرانکەرەکانی بپارێزێت".
لەلایەکی تریەوە، شێخ هومام حەموودی، سەرۆکی ئەنجوومەنی باڵای ئیسلامی عێراق لە بەیاننامەیەکدا وتی: "پیرۆزبایی لە کۆماری ئیسلامی ئێران، سەرکردایەتی و گەل، و لە ڕۆحی شەهیدی شایەت ئیمام سەید عەلی خامنەیی دەکەین بۆ ئەم سەرکەوتنەی کە بەهۆی خۆڕاگرییان لە بەرامبەر تەحەدا گەورەکاندا هاتە دی، کە تێیدا جارێکی تر سەلماندیان ئیرادەی گەلان ناشکێت".
وتیشی: "هەروەها پیرۆزبایی لە هەر کەسێک دەکەین کە لە تەنیشت کۆماری ئیسلامی ئێران وەستا و پشتگیری لە هەڵوێستی کرد لەم ڕووبەڕووبوونەوەیەدا"، جەختیشی کردەوە: کە "ئەم یەکڕیزییە ڕەنگدانەوەی هۆشیارییەکی پێشکەوتووە سەبارەت بە گرنگی یەکڕیزی لە بەرامبەر فشار و هەژمووندا". هەروەها دەستخۆشی لە هەوڵەکانی کۆماری ئیسلامی پاکستان کرد بۆ چەسپاندنی ئاشتی.
لەلایەکی دیکەوە، حزبی دەعوەی ئیسلامی لە بەیاننامەیەکدا ئاماژەی بەوە کرد کە "کۆماری ئیسلامی ئێران و گەلە بەشکۆکەی، بەو خۆڕاگری و قوربانییە گەورانەی پێشکەشیان کرد، سەرکەوتنێکی مێژوویی گەورەیان تۆمار کرد تاوەکو ئەم شەڕە ستەمکارانەیە دوای نزیکەی چل ڕۆژ لە دەستدرێژی وەستا، ئەمەش لە دوای سەرکەوتنی نێوەندگیرییەکەی پاکستان".
بەیاننامەکەی حزبی دەعوە ئاماژەی بەوەشکرد: "ئەم شەڕە دوور بوو لە هەر پاساوێکی عەقڵانی یان ئەخلاقی و تەنها دەستدرێژییەکی ئاشکرا بوو بۆ سەر دەوڵەتێکی خاوەن سەروەری". هەروەها ستایشی ڕۆڵی سەرکردایەتی و لە سەروویانەوە ڕێبەری باڵا ئیمام شەهید سەید عەلی خامنەیی و سەرکردە سیاسی و سەربازییەکانی کرد کە وەک شەهید گیانیان بەخشی.
هەروەها عودەی عەواد، سەرۆکی فراکسیۆنی سادقوون لە ئەنجوومەنی نوێنەران لە بەیاننامەیەکدا ڕایگەیاند: "فراکسیۆنی سادقوون گەرمترین پیرۆزبایی ئاراستەی مەقامی ڕێبەری شۆڕشی ئیسلامی سەید موجتەبا خامنەیی و حکومەت و گەلی ئێران و هەموو ڕۆڵەکانی میحوەری مقاوەمە دەکات بەبۆنەی ئەم سەرکەوتنە مێژووییە لە بەرامبەر دەستدرێژییەکان".
وتیشی: "ڕاگەیاندنی ڕاگرتنی شەڕ و دەستپێکردنی گەڕی دانوستانەکان لە ئیسلام ئاباد، بەرهەمی ساڵانێک لە سەتەبەرکردنی ستراتیژی و قوربانییە. هەڵوێستی مەیدانی ئێران، ویلایەتە یەکگرتووەکانی ناچار کرد لەسەر مێزی گفتوگۆ بەپێی مەرجەکانی ئێران دابنیشێت".
لە کۆتاییدا جەختیکردەوە: "ئێمە ئەمڕۆ و بەیانیش لەگەڵ کۆماری ئیسلامی لە یەک سەنگەردا دەوەستین و بەڵێن بە برایانمان لە تاران دەدەین کە عێراقی خۆشەویست بە جەماوەرە بەغیرەتەکەی و هێزە نیشتمانییەکانی، وەک پشتیوانێکی بەهێز دەمێنێتەوە لە بەرامبەر هەموو ئەو پیلانانەی کە ئاسایشی ناوچەکە دەکەنە ئامانج".
